Qazaqstandyqtar kelesi jyldan bastap BJZQ-daǵy artyq somany "Otbasy bankine" aýdara alady. Bul týraly Sputnik Qazaqstan tilshisine indýstriia jáne infraqurylymdyq damý ministrliginiń baspasóz qyzmeti habarlady.
Ministrlik salymdardy tolyqtyrý bóligine qatysty buiryqqa ózgerister ázirledi, ol qazir pysyqtalyp jatyr.
"Joba pysyqtalyp jatyr, basqa da múddeli memlekettik organdardan eskertýler boldy, qazir solar qaralyp jatyr. Shamamen 2022 jyldyń qańtarynda bastalady", - dep atap ótti ministrliktiń baspasóz qyzmeti.
Aita keteri, Qazaqstan Prezidenti Qasym-Jomart Toqaev halyqqa Joldaýynda qazaqstandyqtarǵa zeinetaqy jinaqtarynyń bir bóligin qarjy jetkilikti sheginen asqan jaǵdaida "Otbasy banktegi" shotqa aýdarýǵa ruqsat berýdi tapsyrdy. Onyń aitýynsha, bul shara qarajat jinaý jáne olardy durys basqarý ádetin qalyptastyrýǵa múmkindik beredi.
Sonymen qatar 3 jeltoqsanda Qazaqstanda 2022 jyly zeinetaqy jinaqtaryn merziminen buryn alý úshin jetkilikti sheginiń kórsetkishteri kúrt ósetini habarlandy.
Zeinetaqy jinaqtaryn paidalaný úshin jetkilikti shegi 21 jasta – 3,2 mln teńge, 22 jasta – 3,3 mln teńge, 30 jasta – 4,4 mln teńge, 40 jasta – 5,8 mln teńge, 50 jasta – 7,4 mln teńge bolýy qajet.
BJZQ eń tómengi jetkilikti sheginiń somasy árbir jas úshin esepteletinin jáne bolashaq zeinetaqy tólemderi men zeinetaqy jarnalarynyń artýy eskerilgenin habarlady. Bul rette "respýblikalyq biýdjet týraly" Zańǵa sáikes jyl saiyn indeksteletin eń tómengi jalaqy, eń tómengi zeinetaqy, eń tómengi kúnkóris deńgeii siiaqty áleýmettik kórsetkishter paidalanylady. Osyǵan bailanysty jetkilikti sheginiń mólsherin esepteý jyl saiyn osy kórsetkishterdiń ósýin eskerip júrgiziledi.
