QR UQK daiyndaǵan «Jýsan» gýmanitarlyq arnaiy operatsiiasy aiasynda júrgizilgen aýqymdy jumystar týraly baiandaityn «Raqymdy uiǵarym» atty derekti filmniń tusaýy kesildi, dep habarlaidy QazAqparat.
Derekti filmde ulttyq qaýipsizdik organdarynyń jedel qyzmetkeri alǵash ret qarýly qaqtyǵys aimaǵynda bolý jaǵdailaryn, arnaiy operatsiianyń daiyndyq protsesin ashady. Qazaqstandyq azamattardy Siriiadan qaitarý boiynsha biregei operatsiiany júrgizýge tartylǵan memlekettik organdardyń kúshteri men quraldary týraly áńgimeleidi.
Film basynda qazaqstandyqtardyń arasynda «Jýsan» operatsiiasy týraly ne bilesiz degen saýalnama júrgizilgen.
«Basqa, teris dini aǵymdardyń izinde ketken qazaqstandyqtardy qaitarý jolynda qolǵa alynǵan «Jýsan» operatsiiasyn durys bastama dep oilaimyn. Óz basym olardyń elge qaita oralǵanyna qýanyshtymyn», - deidi saýalǵa jaýap bergen otandasymyz.
Atalǵan operatsiianyń alǵashqy kezeńinde 47 adam elge oraldy. Onyń ishinde 30 bala, 6 er adam jáne 11 áiel bar. Ekinshi kezeńde 231 otandasymyz Qazaqstanǵa aman-saý oralǵan, atap aitqanda, 156 bala (18 jetim bala), 16 er adam jáne 59 áiel. Úshinshi kezeńde 246 qazaqstandyq otanǵa oraldy. Naqtylai tússek, 171 bala (9 jetim bala), 8 er adam jáne 67 áiel adam bar. Al operatsiianyń tórtinshi kezeńiniń nátijesinde 71 adam, iaǵni 49 bala (5 jetim bala), 3 er adam jáne 19 áiel týǵan jerge oraldy. Jáne besinshi kezeńde 12 qazaqstandyq bar, onyń qatarynda 7 bala (2 jetim bala), 4 er adam jáne 1 áielge elge qaitaryldy.
Opertsiia nátijesinde jalpy jiyny 607 adam otanyna aman-saý oraldy. Olardyń qatarynda, 413 bala (34 jetim bala), 37 er adam jáne 157 áiel bar.
«Bizge Elbasy Nursultan Nazarbaev óz kelisimin berip, qoldady. Opertsiia barysynda kóptegen qiyndyqtarǵa tap boldyq. Otandastyrymyzdy Siriiadan tabý, olardy elge ákelý, ushaqqa otyrǵyzý osynyń bári úlken sharýa. Árine jan-jaqty kelissózder júrgizildi. 2018 jyldyń jartysynan 2019 jylǵa deiin tek daiyndyq jumystarymen ainalystyq», - dedi UQK-niń jedel qyzmetkeri.
QR Syrtqy ister ministriniń orynbasary, qazirgi QR Amerika Qurama Shtattaryndaǵy Tótenshe jáne Ókiletti Elshisi Erjan Ashyqbaevtyń aitýynsha, atalǵan operatsiia barysynda AQSh-pen jáne birqatar halyqaralyq uiymdarmen tyǵyz qarym-qatynasta jumystar júrgizildi.
«Árine keibir memleketter, uiymdar qaýipsizdik turǵysynda áli kúnge deiin óz rólderin aldyńǵy qatarǵa shyǵarmaýǵa tyrysýda. Biz árine olardyń ustanymyna qurmetpen qaraimyz, qabyldaimyz. Sondyqtan osy iske atsalysqan barlyq memleketter men uiymdarǵa alǵysymyzdy bildiremiz. Kem degende 20 memleket pen halyqaralyq uiymdar qol ushyn sozdy», - deidi E. Ashyqbaev.
Operatsiiaǵa qatysýshylardyń aldynda Siriiada qansha otandasymyz bar, olardyń jaǵdaiy qalai jáne olardyń qaýipsizdigin qamtamasyz etý máselesi turǵan.
«Biz shamamen qansha adam baryn bildik, degenmen naqty sanyn bilmedik. Osy maqsatta 2018 jyldyń qarasha aiynda alǵash Siriiaǵa bardyq. Maqsat – otandastarymyzdyń sany men jaǵdaiyn bilý. Ondaǵy biz kórgen jaǵdai jantúrshilgerlik. Barǵan soń lagerler men áskeri gospitaldardy aralap, jerlesterimizdi túgeldeýge kóshtik», - deidi UQK-niń jedel qyzmetkeri.
«Jýsan» operatsiiasy barysynda elordada Siriiadaǵy otandastarymyzdy qutqarýshylarmen tikelei bailanys qurý maqsatynda jedel shtat qurylǵan.
«Soǵys, qaqtyǵys bolyp jatqan aimaqqa barý qiynǵa soqty. Soǵan qaramastan az ýaqyttyń ishinde azamattarymyzdy taýyp, tiisti sharalardy qabyldai bildik. Jalpy Qazaqstan soǵys aimaqtarynan óz azamattaryn alǵan alǵash memleketterdiń biri boldy. Ata-anasyz qalǵan balalarǵa DNQ saraptamasyn júrgizip, óz qandasymyz ekenin anyqtalǵannan keiin ǵana elge ákelindi. Tipti Qazaqstan azamaty bolmasa da bizdi de ala ketińizdershi dep ótingender boldy», - deidi E.Ashyqbaev.
«Biz jaqynyn jamandyqqa qimaǵan, jaýǵa bermegen halyqpyz. Memlekettiń basty qundylyǵy – adam. «Jýsan» operatsiiasy bul adam ómiri, onyń bolashaǵy jáne eń bastysy árbir qazaqstandyqtyń ómiri memlekettiń basty múddesi ekenin kórsetti. Sol sekildi bul birneshe memlekettik organdardyń nátijeli jumysyn kórsetip otyr. Qazir osy operatsiianyń barysyn basqa memleketter de zerdelep, qarap jatyr. Sol arqyly adam memlekettiń qorǵaýynda ekenin dáleldep otyrmyz. Azamattarymyzdy elge alyp kelý bir bólek, al olardy qalypty ómirge qaita beiimdeý birneshe organdardyń qoian-qoltyq júieli eńbegi», - dep óz oiymen bólisti QR Aqparat jáne qoǵamdyq damý ministri Aida Balaeva.
Atalǵan operatsiianyń nátijesinde Siriiadan elge oralǵandardyń biri Ásiia Asqar atty jerlesimiz.
«Meniń 6 balam bar. Onyń bireýi sonda qalyp qoidy. Siriiada júrgende internetten Nursultan Nazarbaevtyń qazaq eli eshqashan jetim-jesirin dalada tastamaidy degen sózin estip qýanyp, elge qaitý jolyndaǵy úmitim sónbedi», - deidi Asqar.
