El turǵyndary 2020 jyldyń shilde aiynda 2700-den astam altyn quima satyp aldy, dep habarlaidy "Ult aqparat" QR Ulttyq bankiniń baspasóz qyzmetine silteme jasap.
«2020 jyldyń shilde aiynda el turǵyndary ekinshi deńgeidegi bankterden jáne banktik emes aiyrbastaý pýnkterinen jalpy salmaǵy 113,1 keli 2 712 ólshemdi quima satyp aldy», – delingen habarlamada.
Altyn quimalary 5, 10, 20, 50 jáne 100 gramdyq bolyp bes salmaqta satylǵan. Sonyń ishinde eń kóp satylǵany 10 gramdyq quima.
Onyń satyp alýda Almaty qalasy (satylǵan quimanyń 54%), odan keiin Atyraý (16%), Nur-Sultan (10%) kóshbastady. Basqa óńirlerde bul kórsetkish 20% boldy.
«Keri satyp alýǵa jalpy massasy 3 kelini quraityn 114 ólshemdi quima qabyldandy. Altyn quimalary – investitsiialaýdyń senimdi quraly. Bankterdiń jáne banktik emes aiyrbastaý pýnkteriniń klientke «sol kúni» aqsha tólei otyryp, quimalardy keri satyp alý múmkindigi – altyn quimalary naryǵynyń ótimdiligin qamtamasyz etýdiń negizgi faktory»,– dep habarlady Ulttyq bank.
Qazirgi kezde altyn quimalaryn Halyk Bank-ten, Eýraziialyq ankten, Jýsan Bank-ten, Bank TsentrKreditten, sondai-aq aiyrbastaý pýnkterinen satyp alýǵa jáne olardy qaita ótkizýge bolady.
Árbir quima qorǵanysh elementterimen (quimalardyń bet jaǵy ainadai, mikromátin jáne bederli gýrt) jáne quimalardy mehanikalyq zaqymdanýdan qorǵaityn jáne oraýy ashylǵanyn nemese ashylmaǵanyn tez anyqtaýǵa múmkindik beretin arnaiy oraýda shyǵarylady. Qorǵanysh oraýy quima sapasynyń sertifikatyn bildiredi.
Ulttyq banki altyn quimasyn satý baǵdarlamasyn 2017 jyly iske qosty. 2017 jyldan bastap jalpy salmaǵy 1,1 tonna 30 855 ólshemdi quima satyldy.
