Foto: Sergei Savostianov / TASS
Ishki ister ministrliginde ótken dástúrli baspasóz máslihatynda IIM Kóshi-qon qyzmeti komitetiniń aǵa inspektory Nurjan Jańabaev pasport pen jeke kýálikti alǵan kezde azamattardy mindetti daktiloskopiialyq tirkeý engiziletinin aitty, dep habarlady Azattyq Ruhy.
«Daktiloskopiialyq tirkeý - bul saýsaqtardyń papilliarlyq úlgileriniń qurylymdyq erekshelikteri týraly aqparat alý. Onyń maqsaty - adamnyń múddelerin qorǵaý, onyń zańdy quqyqtaryn, densaýlyǵy men qaýipsizdigin qamtamasyz etý. Birinshiden, atalǵan is-sharalar jeke tulǵalardy biometriialyq sáikestendirýdi jetildirýge baǵyttalǵan, bul óz kezeginde zańsyz qujattandyrý faktilerin boldyrmaýǵa, qujattardy qoldan jasaýdan, olardyń ielerin alaiaqtyq jáne ózge de qylmystyq áreketterden qorǵaýǵa múmkindik beredi», - dep túsindirdi aǵa inspektor.
Belgili bolǵandai, daktiloskopiialyq tirkeý bizdiń azamattarymyzdyń basqa elderdiń memlekettik shekaralaryn kesip ótý rásimin jeńildetýdi de kózdeidi.
«Bul kúndelikti ómirde de, jazataiym oqiǵalarda da, sonyń ishinde tehnogendik jáne tabiǵi sipattaǵy jeke basyn kýálandyratyn qujattardy qalpyna keltirý rásimin jeńildetip qana qoimaidy, sonymen qatar jedeldetedi. Bolashaqta daktiloskopiialyq aqparattyń arqasynda zamanaýi smartfondar arqyly memlekettik qyzmetterdi qashyqtyqtan alýdy odan ári damytý múmkindigi paida bolady», - deidi Nurjan Jańabaev.
Aǵa inspektordyń aitýynsha, 12 men 16 jas aralyǵyndaǵy balalar erikti túrde tirkele alady.
«12 jasqa deiingi balalardan basqa, Qazaqstan Respýblikasynyń barlyq azamaty jáne elde turaqty turatyn sheteldikter daktiloskopiialyq tirkeýge jatady. 12 men 16 jas aralyǵyndaǵy balalar erikti túrde tirkele alady. Saýsaq izderin alý HQKO-larda jeke kýálikterdi, pasporttardy, sheteldiktiń turýǵa yqtiiarhattaryn jáne azamattyǵy joq adamnyń kýálikterin resimdeý kezinde júrgiziletin bolady. Ártúrli sebeppen jeke basyn kýálandyratyn qujattardy alǵash ret alatyn nemese aýystyratyn qazaqstandyqtar saýsaq izin túsirýden ótedi. Mysaly, jaramdylyq merzimi aiaqtalǵan, tegi, aty jáne ákesiniń aty ózgergen jaǵdaida, qujat joǵalǵan nemese urlanǵan jaǵdaida», - dedi ol.
