Biylǵy toǵyz aida qazaqstandyqtar 451,2 mlrd teńgege 49 243 jeńil jáne jeńil kommertsiialyq jańa avtomobil satyp aldy, dep habarlaidy "Ult aqparat".
Qazaqstannyń avtomobil salasy kásioryndary odaǵynyń málimetinshe, satyp alynǵan jeńil kóliktiń ortasha quny 8,88 mln teńgeni qurady jáne ótken jyldyń dál osyndai kezeńimen salystyrǵanda 5,6 paiyzǵa qymbattady. Bul rette, Qazaqstanda qurastyrylǵan avtomobilder segmentinde bul tsifr ortasha naryqtyq mánnen aitarlyqtai tómen boldy jáne 6,6 mln teńgeni qurady. Shetelden jetkizilgen kólikterdiń ortasha baǵasy 10,9 mln teńge mólsherinde belgilendi.
Satyp alýshylar 5 mln teńgeden qymbat emes kólikterdi tańdaǵan. Osydan bir jyl buryn bul segment naryqtyń 37 paiyzyn quraǵan edi. Quny 5 millionnan 7 million teńgege deiingi 9 834 avtomobil satyldy. Al baǵasy 7-10 million teńge aralyǵyndaǵy kólikterdi 7 215 qazaqstandyq satyp alǵan.
Biznes (10-15 mln teńge) jáne premiým-sanat (15 mln teńgeden joǵary) segmentinde 13 406 jáne tiisinshe 5 211 avtomashina satylǵan.
Qoljetimdi kólikterdiń úzdik ondyǵynyń basym bóligin qazaqstandyq avtomobil qurastyrýshylardyń ónimderi alyp otyr. Aitalyq, Óskemende qurastyrylǵan, quny 3,1 mln teńgeden bastalatyn Lada Granta kóligi qazaqstandyqtar úshin barynsha qoljetimdi bolyp tur. Munan bólek, qoljetimdi kólikterdiń úzdik ondyǵyna mynalar kiredi: Chevrolet Niva (3,4 mln teńge), Ravon Nexia (3,5 mln), Lada 4x4 (3,6 mln), Ravon R4 (4,1 mln), Renault Logan (4,1 mln), Renault Sandero (4,1 mln), KIA Picanto (4,8 mln), Renault Duster (4,9 mln) jáne JAC S3 (4,9 mln).
Al eń qymbat temir tulparlardyń reitingi tómendegidei túzilgen: Mercedes-Benz G-klass (63,1 mln teńge), Porsche Panamera (48,9 mln), Jaguar I-Pace (46 mln), BMW 7 seriia (45,3 mln) jáne Porsche Cayenne (43,2 mln).
