Reseidiń Ozon elektrondy saýda alańynda qazaqstandyq óndirýshiler ónimin usyna alatyn boldy, dep habarlaidy "Ult aqparat".
Bul týraly Saýda jáne integratsiia ministri Baqyt Sultanov Facebook paraqshasynda jazdy.
«Reseilik e-commerce alpaýytynda 16 million turaqty klienttiń bazasy jáne 80 millionnan astam ai saiynǵy paidalanýshy bar. Marketpleiste kiim men taǵamnan bastap balalar ónimderi men kosmetikaǵa deiingi 20 túrli sanattaǵy taýarlar usynylady. Bul, meniń oiymsha, qazaqstandyq kásipkerler úshin úlken naryq. Endi kez kelgen qazaqstandyq óndirýshi osy ámbebap alańda óz taýaryn usyna alady», - dep jazady ministr.
Onyń sózine qaraǵanda, Ozon-da buǵan deiin qazaqstandyq óndirýshilerdiń aiaq kiim ónimderi men zergerlik buiymdary, aýylsharýashylyq ónimderi usynylyp kelgen.
«Biraq Wildberries siiaqty, saitqa kirý úshin bizdiń kompaniialar Resei Federatsiiasynyń aýmaǵynda filialdar ashýǵa májbúr edi. Bul biznes úshin óte yńǵaisyz jáne qymbat. Logistikany jetildirý jergilikti biznestiń Ozon-ǵa shyǵýyna yqpal etti. Mamyrdan bastap bizdiń kásipkerler Reseige taýarlardy tikelei klientke ózderi nemese úshinshi tarap tasymaldaýshylarynyń kómegimen jetkize alady. Jaqyn arada Ozon sondai-aq qazaqstandyq biznestiń taýarlaryn Reseige tasymaldaityn seriktes-logisterdiń tizimin usynady. Sondai-aq, qazir bizdiń taýarlardy keiinnen Resei men basqa óńirlerge jetkizý úshin qoimalaý múmkindigi pysyqtalýda», -dep bólisti Baqyt Sultanov
Ozon-da sadýa jasaǵysy keletin qazaqstandyq óndirýshiler myna nusqaýlyq boiynsha tirkele alady: munda tómendegidei qysqa nusqaýlyq bar:
1. seller.ozon.ru. mekenaiy boiynsha saitta satýshy retinde tirkelý;
2. Kompaniianyń jarǵylyq qujattaryn tirkeý jáne tekserýdi kútý;
3. Naryqtaǵy usynysty qabyldaý;
4. Ónim kartalaryn jasaý;
5. Qoimanyń qai jerde ornalasqanyn, taýarlardy qaidan jetkizetindigińizdi kórsetý;
6. Ozon-nan alǵashqy tapsyrysyńyzdy kútý.
Vedomstvo basshysynyń aitýynsha, Ozon týraly tolyq aqparatty global.ozon.ru saitynan alýǵa bolady.
