Qazaqstandaǵy eń iri bankterdiń kepilsiz tutynýshylyq nesielerine taldaý jasaldy. Bul týraly QazAqparat Ranking.kz-ke silteme jasap habarlaidy.
Tamyz aiyndaǵy kórsetkishterge sensek, bankter tarapynan el ekonomikasyna 13,05 trln teńge nesie salynǵan. Ásirese, bólshek nesieniń úlesi artqan. Bir jyldyń ishinde jeke azamattardyń nesie rásimdeýi 21,7 paiyzǵa ósip, 6,01 trln teńge bolǵan. Onyń 3,8 trln. teńgesin qarapaiym tutynýshylyq nesieler quraidy. Bul jalpy nesie naryǵynyń 29,1 paiyzyna teń.
«Kepilsiz tutynýshylyq nesielerdi eldegi 19 ekinshi deńgeili bank berip otyr. Solardyń arasynda 9 bank nesieni eńbekaqyǵa bailamai, ózge de talaptarsyz berýge daiyn. Onyń ishinde nesieniń jyldyq eń tiimdi mólsherlemesi 17,2 paiyz bolyp tirkelgen. Mundai qaryzdyń eń úlken somasy - 7 mln teńge. ATFBank, ForteBank jáne Bank TsentrKredit osynsha somany kepilsiz berýge daiyn. Ol somany 84 aida bólip tóleýge bolady. Al Jýsan Bank, Bank RBK jáne Sberbank 6 mln teńgeden kepilsiz nesie berýde. Olar bul somany 60 aiǵa bólip tóleýdi usynyp otyr. Nesie naryǵynda eń kóp tanymal shart ta osy 60 ailyq merzim bolyp tur», - dep jazady Ranking.kz.
