Qazaqstandyqtar koronavirýstyń aldyn alý sharalarynan Eýropa elderinen góri molyraq habardar. Bul týraly Qazaqstannyń Bas sanitarlyq dárigeri Jandarbek Bekshin aitty, dep habarlaidy QazAqparat.
«Qańtar aiynyń alǵashqy kúnderinen bastap-aq, aqpan aiynda da bizdiń elge Eýropadan kelgen tanystar «Nelikten baibalam salyp jatyrsyzdar? Bizde - Eýropada bári tynysh» dep tańǵalǵan edi. Germaniiadan kelgen stýdentterdiń, Ninderlandy men Polshadan kelgen tanystardyń osylai degeni esimde. Olar áýejailardaǵy teplovizorlarǵa tańdanǵan bolatyn. Álbette, endi kelip, olarda sondai jaǵdai tirkelip jatsa – buǵan kim kináli? Olar da tiisti sheshim qabyldaýy kerek edi. Meniń oiymsha, qańtardyń alǵashqy kúninen bastap máseleni baqylaýǵa alǵanda keibireýler buǵan kúmánmen qaraǵan edi. Al qazir, Qazaqstan sol sharýany der kezinde júrgizgenin ýaqyttyń ózi dáleldep otyr», - dedi Jandarbek Bekshin búgin OKQ-da ótken baspasóz máslihatynda.
Bas sanitarlyq dáriger BAQ ókilderimen bul másele boiynsha kúndelikti kezdeskenin aityp ótti.
«Mine, sol sebepti bizdiń halyq aldyn alý sharalarynan Eýropa elderinen góri molyraq habardar. Meniń oiymsha, bul - bizdiń sizdermen júrgizgen jumystarymyzdyń arqasy. Bizdiń halyq koronavirýstan qalai qorǵanýdy jeke jáne ujymdyq deńgeide biledi degen sóz. Aldaǵy ýaqytta da tek resmi aqparattarǵa súienýdi suraimyn», - dedi ol.
Eske sala ketsek buǵan deiin QR Bas sanitarlyq dárigeri koronavirýs órshigen elderge sapar shekpeýge keńes bergen bolatyn.
