Qazaqstanda ótken jyly tynys alý organdarynyń aýrýlarynan 21 myńǵa jýyq adam qaitys boldy, olardyń 195-i - 1 jasqa deiingi náreste, dep habarlaidy QazAqparat energyprom.kz saityna silteme jasap.
2021 jyly anyqtalmaǵan joǵarǵy tynys alý joldarynyń jedel infektsiiasy - eń kóp tirkelgen aýrý túri boldy. Bul diagnoz 1,2 million adamǵa qoiylǵan. Odan keiin COVID-19: 870,8 myń adam juqtyrǵan, olardyń 832,8 myńy – identifikatsiialanǵan virýs.
Sonymen qatar, jelsheshek (16,4 myń adam zardap shekti) pen jiti ishek infektsiialarynyń tobyna jatatyn syrqat (8,9 myń adam) túrleri kúrt artty. Odan bólek, 3,5 myń adamda AITV infektsiiasy (adamnyń immýn tapshylyǵynyń virýsy), 4,6 myń adamda sozylmaly virýstyq gepatitter, 2,3 myń adamda merez anyqtaldy. 18 jasqa deiingiler anyqtalmaǵan joǵarǵy tynys alý joldarynyń jedel infektsiiasynan kóp zardap shekti - 627,5 myń bala. 538 baladan týberkýlez anyqtaldy.
Tynys alý organdarynyń aýrýlarynan 20,8 myń adam, juqpaly jáne parazittik aýrýlardan 1,4 myń adam qaitys boldy. Tynys alý organdarynyń aýrýlarynan qaitys bolǵan balalar sany bir jylda 12,9% azaiyp, 195 boldy. Al juqpaly jáne parazittik aýrýlardan kóz jumǵan balalar sany 26,8% azaidy - 180 bala.
COVID-19-ǵa keler bolsaq, óńirler arasynda virýsty eń kóp juqtyrý jaǵdaiy Nur-Sultanda tirkelgen: 10 myń adamǵa 1118 jaǵdai. Odan keiin Almaty (10 myń adamǵa 824 jaǵdai) jáne Qaraǵandy (10 myń adamǵa 711 jaǵdai) oblystary tur.
