Biylǵy on aida otandyq avtoóndirýshiler 62 myńǵa jýyq kólik quralyn qurastyrdy, dep habarlaidy "Ult aqparat".
«QazAvtoÓnerkásip» Qazaqstannyń avtomobil salasy kásiporyndary odaǵynyń málimetinshe, qańtar-qazanda elimizdiń aýmaǵynda jalpy quny 460,9 mlrd teńge bolatyn 61 796 avtokólik quraly (jeńil, júk kóligi, avtobýs tehnikasy, arnaýly mashinalar men tirkemeler) qurastyryldy. Shyǵarylǵan ónim kólemi naqty mánde ótken jylǵy kórsetkishten 58,4 paiyzǵa asyp tústi.
Jeńil avtomobil qurastyrý 51,5 paiyzǵa artyp, 51 922-ge jetti. Avtobýs shyǵarý da 67,4 paiyz ósip, esepti kezeńde 1 525 kólik qurastyryldy. Sonymen qatar 6 299 júk kóligi, 284 mamandandyrylǵan avtotehnika jáne 1 766 tirkeme shyǵaryldy.
2020 jyldyń qazanynda qazaqstandyq kásiporyndardyń konveierinen 11 140 avtokólik quraly qurastyryldy. Bul, 2019 jylǵy kórsetkishten 2 ese joǵary. Sonymen qatar qyrkúiekpen salystyrǵanda qazanda avtokólik óndirisi 1,6 ese ósti.
Jyl basynan beri otandyq avtozaýyttar 52 988 kólik satty. Bul ótken jylǵy kórsetkishten 53,7 paiyzǵa kóp. 2020 jyldyń 10 aiynda Qazaqstanyń avtoónerkásip kásiporyndarynyń naryqtaǵy úlesi 72,2 paiyzǵa jetti.
Respýblika turǵyndarynyń jergilikti óndiristen shyqqan avtomobilderdi satyp alýǵa shyǵystary 404,5 mlrd teńgege jetip, bir jyl burynǵy kórsetishten 82,1 paiyz asyp tústi.
Esepti kezeńde Qazaqstanda qurastyrylǵan jeńil kólikterdiń arasynda Lada (15089), Hyundai (13455), Ravon (5726), Chevrolet (5636) jáne KIA (4922) markalaryna suranys joǵary boldy. Sonymen qatar otandyq kásiporyndar usynatyn kólik markalarynyń tizimine JAC (1527), UAZ (538) jáne Skoda (249) kirdi.
Eń kóp satylǵan kólik markalary qatarynda Lada Granta (6634), Ravon Nexia R3 (5726), Hyundai Tucson (3795), Lada Vesta (3531) jáne Hyundai Accent (3443) bar. Munan bólek, qazaqstandyq tanymal modelder qataryn Chevrolet Cobalt (2905), Lada 4x4 (2705), KIA Rio (2684), Hyundai Creta (2561) jáne Lada Largus (1865) tolyqtyrady.
Aita keterligi osy jyldyń qańtar-qazanynda 7 362 avtomobildi jeńildetilgen avtokredit memlekettik baǵdarlamasyna qatysýshylar satyp aldy.
