Qazposhta arqyly Qazaqstanda gazet-jýrnaldarǵa jazylýdyń jalpy kólemi 108 363 590 danany qurady. 2019 jyldyń 9 aiynyń qorytyndysy boiynsha derekter osyndai.
"Respýblikalyq gazetterdiń úzdik bestigine "Egemen Qazaqstan", "Jas Alash", "Ana Tili", "Kazahstanskaia pravda" jáne "Uiǵyr avazi" basylymdary kirdi. Aimaqtyq kóshbasshylar arasynda – "Jetisý", "Aqtóbe", "Ogni Alataý", Aq Jol, "Iýjnyi Kazahstan" gazetteri bar", - delingen "Qazposhta" habarlamasynda.
El boiynsha barlyǵy 204 respýblikalyq jáne 521 aimaqtyq gazet jazylym boiynsha taratylady. Jazylýdyń jalpy kólemindegi respýblikalyq basylymdardyń úlesi 45%-dy, óńirlik basylymdardyń úlesi 54%-dy qurady. Tirajdyń 1%-y halyqaralyq merzimdi basylymdarǵa tiesili. Qazaqstandyqtar Qazaqstan, Resei, Belarýs jáne Ýkrainanyń 3 myńnan astam gazet-jýrnaldaryna Qazposhta arqyly jazylý múmkindigine ie.
Gazet-jýrnalǵa jazylý aýyldarda kóp tirkelgen: barlyq taralymnyń 73%-y. Aýyl turǵyndary oblystyq, qalalyq jáne aýdandyq basylymdarǵa jazylǵandy (jalpy tirajdyń 58%-y) jón kóredi. Jazylý boiynsha Qazaqstannyń óńirleri arasynda Almaty, Qyzylorda, Qaraǵandy jáne Jambyl oblystary kósh bastap tur.
"Statistika jazylý tirajynyń tómendegenin kórsetti. Ótken jyl qorytyndysy boiynsha jazylýdyń jalpy kólemi 127,8 mln danany qurady. Biyl qarasha men jeltoqsan ailaryna jazylý áli jalǵasýda jáne jyl sońynda kórsetkishter shamaly ósedi. Biraq tutastai alǵanda ótken jyldyń kórsetkishinen aspaidy. Biz elektrondyq basylymdarǵa kóshý – qazaqstandyq statistikany rastaityn jalpy álemdik trend ekenin túsinemiz", – deidi "Qazposhta" AQ "Poshtalyq servis" filialynyń direktory Nurjan Jabaev.
Qazirdiń ózinde 2020 jylǵa jazylý bastalyp ketti. Baspasózge jazylýdy kez kelgen Qazposhta bólimshesinde resimdeýge bolady.
