Qazaqstandyqtar Internetten góri telearnalardy kóp kóredi.
Bul jaiynda elordada ótip jatqan Astana Media Week aiasynda «Vi Qazaqstan» kompaniiasynyń bas direktory Ilmýrad Djýmaev aitty, dep habarlaidy QazAqparat.
«Televidenie qazaqstandyq jarnama naryǵynyń mańyzdy segmenti ekendigi sózsiz. Eger jalpy kólemde alyp qaraityn bolsaq, televidenie - 55, al Internte 16 paiyzdy alyp otyr. Tek Internet jaiynda kóbirek aitylyp jatady. Degenmen, taiaý aralyqta televidenie qamtýy úlken media bolyp qala beredi. Iaǵni, eger siz taýaryńyzdy ne qyzmetińizdi kóp adamǵa jetkizgińiz kelse, onda telearnalarǵa balama joq», - dedi ol.
Osy rette ol dálel retinde media resýrstardy tutyný statistikasyn alǵa tartty.
«Eger Internetti media tutyný jaiynda sóz qozǵar bolsaq, qazaqstandyqtar messendjerlerdi qosa alǵanda ortasha eseppen 255 minýt jumsaidy. Ázirshe, teledidardy kóp kóredi. Shamamen kúnine 5 saǵat nemese 272 minýt kóredi. Alaida bul alshaqtyq qysqara túsýde», - dedi Ilmýrad Djýmaev.
Aita keteiik, Astana Media Week sharasynyń ekinshi kúninde Qazaqstandaǵy alǵashqy - «ADTribune - Aziianyń jarnamalyq daýysy» atty jarnamalyq konferentsiia ótip jatyr. Onda saladaǵy máseleler, qiyndyqtar men trendter týraly ashyq aitylýda. Sonymen qatar osy kúni «TRENDZONE» kommýnikativtik alańynda iskerlik kommýnikatsiialar boiynsha ashyq seminar uiymdastyrylǵan.
