Qazaqstanda ortasha eseppen aýdany 40 sharshy metr bolatyn bir bólmeli páter 10,5 mln teńge turady. Al, Astana men Almaty qalalarynda baǵa 13 mln teńgeden asady. Eń arzan páterler Qyzylorda qalasynda, onda 5,6 mln teńge eken.
Eger qazaqstandyqtardyń jalpy otbasylyq biýdjeti 120 myń teńgeden aspasa, olardyń bir bólmeli páter úshin tólemi otbasylyq tabystyń jartysynan asady. Almaty men Astanada jeke bas qajettilikterine jalaqynyń besten bir bóligi jumsalady dep esepteledi. Eger Qyzylordada turatyn bolsa, otbasy ailyq tabysynyń jartysynan az bóligin ipotekalyq nesiege tóleitin bolady.
Al osyndai otbasylar úshin ústemaqy 4,5% bolǵan jaǵdaida ǵana ipotekalyq nesie tiimdi bolady. Tek ailyq tabysy 210 myń teńgeden asatyn qazaqstandyqtar úshin tabysynyń jartysynan kóbi ózinde qalady.
Aita keteiik, elimizdegi azamattardyń shamamen jartysynyń ailyq tabysy 90 myń teńgeden tómen.
Esterińizge sala keteiik, Ulttyq bank «7-20-25» ipotekalyq baǵdarlamasy boiynsha ailyq tólem men ózge de málimetterdi jariialaǵan bolatyn. Sonymen qatar, retteýshi zaimnyń eń úlken kólemi qalaǵa bailanysty bolatynyn jetkizdi. Osylaisha Almaty, Astana, Atyraý men Aqtaý qalalarynda ol 25 mln teńge bolady. Ózge qalalar úshin ol 10 mln teńge shamasynda bolady dep boljanýda. Al, jańadan salynǵan úilerdiń quny aimaqtarda 7 mln teńgege jýyq bolady dep josparlanýda. Budan basqa, Ulttyq bank tóraǵasy Daniiar Aqyshev jeńildetilgen ipotekalyq nesie mindetti túrde memleketke qaita qaitarylýy kerek dep basa aitqan bolatyn.
Búginde jyljymaityn múlik naryǵyna qatysýshylar jeńildetilgen ipotekalyq nesie berile bastaityn bolsa elimizdegi turǵyn úi baǵasy 5-7%-ǵa kóterilýi múmkin dep boljam jasaýda. Alaida, búginniń ózinde Qazaqstandaǵy ipotekalyq nesieniń ústemaqysy EAEO elderiniń ishinde eń joǵary bolyp eseptelinedi.
