Qazaqstandyqtar 42 500 teńge áleýmettik tólemdi qaitarýǵa mindettelmeidi, dep habarlaidy "Ult aqparat" stopfake.kz resýrsyna silteme jasap.
Áleýmettik jeliler men messendjerlerde TJ rejimine bailanysty tabysyn joǵaltqandarǵa tólengen 42 500 teńge mólsherindegi tólemderdi qaitarý qajet degen qaýeset taraýda. Paidalanýshylar bankterdiń mobildi qosymshasyndaǵy «Áleýmettik kómekti qaitarý» paraqshasynyń ekrannan túsirilgen sýretin jiberýde.
Memleketten alynǵan qarajatty qaitarýǵa bolady. Biraq, mindetti emes.
«Tótenshe jaǵdai rejimi kezinde keibir azamattar 42 500 teńge mólsherinde áleýmettik tólemderdi zańsyz alǵan. Óitkeni olar tabysyn joǵaltqan joq. Sondyqtan ekinshi deńgeili bankterdiń mobildi qosymshalarynda azamattarǵa zańsyz alǵan qarajatty qaitarýǵa múmkindik beretin fýnktsional qarastyrylǵan. Tólemder tólene bastalǵaly shamamen 180 000 adam ony qaitardy. Bul erikti túrde jasalady jáne MÁSQ bárinen tólengen aqshany qaitarýdy talap etedi degen sóz emes», - dep túsindirdi QR Eńbek jáne halyqty áleýmettik qorǵaý ministrliginiń baspasóz hatshysy Aleksandr Kononets.
Qatelesip alǵan áleýmettik kómekti qaitarý úshin Kaspi Bank mobildi qosymshasynda tiisti fýnktsiiany iske qosyldy. Bul óte yńǵaily. Ol sáýirden bastap jumys istep keledi jáne Tótenshe jaǵdai rejimi kezinde 42 500 teńge alǵandardyń bárine qoljetimdi boldy. Qazir onyń qyzmeti toqtatyldy.
– Karantin kezinde áleýmettik tólem alǵan, biraq tabysyn joǵaltpaǵan azamattar úshin aqsha qarajatyn qaitarý fýnktsiiasy Kaspi.kz mobildik qosymshasynda iske qosylǵan. Bul tólemderdi qaitarý – árbir QR azamatynyń erikti jáne derbes sheshimi, – delingen StopFake.kz Kaspi Bank portalyna joldaǵan saýalyna berilgen resmi jaýapta.
«Barshańyzdy tek resmi aqparatqa ǵana senýge shaqyramyz» dep jazady portal.
