16 myńnan astam qazaqstandyq zeinetaqy jinaǵyn paidalaný arqyly 62 mlrd teńgeden astam turǵyn úi qaryzyn tolyǵymen ótedi, dep habarlaidy "Ult aqparat".
QR Prezidentiniń baspasóz hatshysy Berik Ýáli Memleket basshysy Qasym-Jomart Toqaevtyń turǵyn úi jaǵdaiyn jaqsartý úshin zeinetaqy jinaqtaryn paidalanýǵa berý jónindegi tapsyrmasynyń oryndalýy týraly aralyq nátijelerdi usyndy.
Atap aitqanda, búginge deiin 16 075 qaryz alýshy buǵan deiin bankterden turǵyn úileri úshin alǵan jalpy somasy 62 milliard 41 million teńge ipotekalyq qaryzyn tolyq ótedi.
47 133 qaryz alýshy jalpy somasy 144 milliard 53 million teńge bolatyn turǵyn úi ipotekalyq qaryzdarynyń bir bóligin óteý úshin birjolǵy zeinetaqy tólem júiesin paidalandy.
8 889 qaryz alýshy bankterden jalpy somasy 150 milliard 361 million teńge bolatyn turǵyn úi ipotekalyq qaryzdaryn alý úshin alǵashqy jarna retinde birjolǵy zeinetaqy tólemi qarajatyn paidalandy.
Bankter boiynsha eń kóp qaryz alýshy «Otbasy Bank» aktsionerlik qoǵamynda tirkelgen. Olardyń jalpy sany – 37 228. Birjolǵy zeinetaqy tólemin paidalaný arqyly turǵyn úi qurylys jinaqtary júiesi boiynsha berilgen jańa turǵyn úi ipotekalyq qaryzdarynyń mólsheri – 125 milliard 29 million teńge.
«Sberbank» AQ EB – qaryz alýshylar sany boiynsha ekinshi orynda. Olardyń jalpy sany – 11 483. Odan keiin «Qazaqstannyń Halyq banki» aktsionerlik qoǵamynan – 9 488 jáne «Bank Tsentr Kredit» aktsionerlik qoǵamynan – 8 432 adam qaryz alǵan. Atalǵan bankterden birjolǵy zeinetaqy tólemin paidalaný arqyly jańadan alynǵan turǵyn úi ipotekalyq qaryzdarynyń mólsheri – 23 milliard 167 million teńge.
