Qazaqstandyq ziltemirshi Anna Nurmuhambetova 8 jyldan keiin London Olimpiadasynyń kúmis júldesin ielenýi múmkin.
69 kelige deiingi salmaqta dodaǵa qatysqan qazaqstandyq sportshy qossaiys qorytyndysy boiynsha 5-oryn alǵan bolatyn. 2016 jyly bul salmaqta qola jáne 4-oryn alǵan belarýs aýyr atletteri Marina Shkermankova men Dina Sazonovets doping qoldanǵany úshin júldesinen aiyrylyp, Anna Nurmuhambetova úshtikke engen edi.
Búgin belgili bolǵandai, Olimpiadanyń kúmis júldegeri rýmyniialyq Roksana Kokoshtyń qan synamasynan tyiym salynǵan "Stanozolol" jáne "Metenolon" preparattarynyń izi tabylǵan. Osylaisha qazaqstandyq aýyr atlettiń nátijesi taǵy jaqsaryp, qola medali kúmiske ainalady.
Degenmen bul is boiynsha áli naqty sheshim qabyldanǵan joq. Anna Nurmuhambetova ótken jyldyń tamyz aiynda Taldyqorǵan qalasynda ótken Spartakiada oiyndarynda 81 kiloǵa deiin salmaq dárejesinde baq synap, altynshy oryn alǵan. Ziltemirshiniń jarys kezinde tapsyrǵan qan synamasynan tyiym salynǵan "Oraltýrinabol" preparaty tabylǵan.
Qazirgi tańda sportshynyń isi boiynsha tergeý-tekserý júrgizilip jatyr. Eger Anna Nurmuhambetovanyń doping qabyldaǵany rastalsa ol 4 jylǵa sporttan shettetilýi múmkin.
Osy kúnge deiin qarsylasy doping qoldanǵany úshin 4 sportshymyzdyń Olimpiada oiyndaryndaǵy nátijeleri jaqsarǵan bolatyn. Atap aitsaq, grek-rim kúresinen 2008 jyly Olimpiadada qola alǵan Nurbaqyt Teńizbaevqa kúmis jáne jeńil atlet Olga Rypakovaǵa qola júlde tabystaldy. Sondai-aq aýyr atlet Alla Vajenina 2008 jylǵy Olimpiadanyń chempiony atansa, Denis Ulanov qola júldeni aldy.
