Tanymal qazaqstandyq jýrnalister koronavirýsqa qarsy vaktsina alýdy jalǵastyrýda, dep habarlaidy QazAqparat.
Telejúrgizýshi, biznesvýmen Dinara Sátjan keshe reseilik Spýtnik-V vaktsinasynyń birinshi komponentin saldyrdy.
«Jaǵdaiym jaqsy. Dene qyzýy kóterilgen joq. Esh jerim aýyrǵan joq. Vaktsinadan keiin jumysqa kiristim, tipti vaktsina alǵanymdy umytyp ta kettim. Men aǵzamdaǵy antideneler taýsylǵandyqtan, vaktsina salǵyzdym. Óitkeni, qaitadan aýyrǵym kelmeidi. Adamzat oba, tyrysqaq, qara sheshek, súzek, týberkýlez aýrýlaryn qalai jeńdi dep oilaisyzdar? Koronavirýs ta – jappai vaktsinalaýdy qarý etýge bolatyn birinshi jaý emes. Menińshe, sekemshil adamdar tuiyq sheńberge túsedi. Olar neǵurlym kóp úreilense, soǵurlym álsiz bolady. Jeliden 5G týraly aqparat pen ózderi sekildi kúdikshil adamdar jazatyn mánsiz áńgimelerdi izdeidi. Qalypty ómir saltyna oralǵysy keletinder, alǵashynda «qarsy» bolyp júrgender de vaktsina jasatady», - dep jazdy Dinara Sátjan óziniń Instagram paraqshasynda.
Al jýrnalist Azamat Erǵali QAZVAC vaktsinasynyń ekinshi dozasyn 21 kúnnen keiin saldyrǵan.
«QAZVAC vaktsinasynyń ekinshi dozasyn alý úshin Nur-Sultan qalasynyń 9-emhanasyna keldim. Adamdar az emes. Emhananyń meditsinalyq qyzmetkerleri shiraq jumys istep jatyr. Turǵyndardyń barlyǵy tirkeledi jáne qandai vaktsinany tańdaǵanyna bailanysty ártúrli kabinetterge jiberiledi. QAZVAC nemese Spýtniktiń birin saldyrýǵa bolady. Ekpe protsesi jolǵa qoiylǵan, esh qarbalas joq. Sary bahilalar berdi», - dep jazdy Azamat Erǵali Facebook paraqshasynda.
Sonymen birge jýrnalist Dina Tólepbergen jaqynda Spýtnik-V vaktsinasynyń ekinshi komponentin alǵan.
«Búgin ekinshisin (vaktsina – red.) aldym. 45 minýt ótti. Osy postty jazyp otyrǵanyma qaraǵanda, shúkir, aiaq-qol dirildep jatqan joq, sanam oiaý. Ary qarai qalai bolaryn bilmeimin. Biraq jaqsylyqqa senemin. Spýtnik V alǵashqy komponentin saldyrǵan soń, 7 kún boiy qyzýym kóterilip edi. Tipti 5-6 kúnderi tura almai, jatyp qaldym. Ekinshi komponenttiń áseri jeńildeý bolsa igi. Koronavirýs saldarynan eń jaqyn adamdaryńdy joǵaltyp alǵannan keiin, kúdiktene, seskene bastaidy ekensiń. Aman bolaiyq, bar bolaiyq», - deidi D. Tólepbergen.
