Kórneki sýret: elements.envato.com
Almatyda estradadaǵy tanymal dýet jarnamalaǵan Safari Mebel kompaniiasynyń basshysy ustaldy. Klientter kompaniiany alaiaqtyq jasady dep aiyptaǵan. Olar kompaniia aqsha alyp, ýáde etilgen jihazdy jasap bermedi dep shaǵymdanǵan, - dep habarlaidy Tengrinews.kz tilshisi.
Almatylyq Aigúl Aldaiarova byltyr kóktemde Almaly aýdanyndaǵy jańa úsh bólmeli páterine jihaz alǵysy kelgen. Ol Safari Mebel-den tórt shkaf, eki kereýet, divan, as úige jáne kireberiske arnalǵan jihazǵa tapsyrys bergen. Áieldiń aitýynsha, bul kompaniiany otandyq juldyzdar jaqsy pikir bildirgenin kórgennen keiin tańdaǵan.
"Olar Instagram-da osy kompaniianyń jihazyn maqtady. Biz de sapaly jihaz izdedik jáne mundai adamdar jarnamalasa, jaqsy kompaniia shyǵar dep oiladyq. Sóitip, sendik. Óitkeni bizdiń juldyzdar kim bolsa sony jarnamalaidy dep oilamadyq. Osy jarnamaǵa aldandyq", - dedi ol.
Aldaiarova 12 zatqa tapsyrys berip, olar aldyn ala ólshep alǵannan keiin kompaniiamen arada bes million teńgege kelisimshart jasaǵan. Safari Mebel basshysy qujatta tapsyrys 45 kún ishinde oryndalatynyn aitqan. Sodan keiin áiel 100 myń teńge kóleminde aldyn ala tólem jasaǵan. Ol bes kún ishinde aldyn ala tólem retinde jalpy kólemi 2,5 million teńge bergen.
"22 naýryzda Safari Mebel direktory Amanjol Smaǵulovpen kelisim jasadyq. Onyń keńsesi "Káýsar" biznes ortalyǵynda ornalasqan. Maǵan taýar chegi berildi, biraq men fiskaldy chek berýin ótindim. Ol keiinirek beretinin aitty, biraq aqyr aiaǵynda bermedi.
Sáýirdiń basynda onyń kompaniiasynyń qyzmetkerleri bólmelerdi ólsheýge keldi. Olar keiin qaita ólshedi. Al 20 sáýirde sońǵy jihazdyń eskizin bekittik. Asúi jihazynyń quny - 1,8 million teńge, shkaftar - 250 myń, kireberis jihazy - 700 myń teńge. Aldyn ala tólemdi mobildi qosymsha arqyly Ysmaǵulovtyń áieliniń shotyna aýdardym", - dep qosty ol.
Almatylyq jihazdy 5 mamyrda alýy kerek edi. Alaida onyń páterindegi jóndeý jumystary bul kúnge deiin aiaqtalmaǵan, sondyqtan Aigúl jihazdardy birneshe kúnnen keiin ákelýin ótingen.
"Kelisimshart jasaǵan kezinde Safari Mebel direktory belgilengen merzim ishinde daiyn turǵan páterge jihaz ornata almasa, biz aiyppul tóleýge májbúr bolatynymyzdy eskertti. Ol osylai qorqytty. Biraq keiin ol ótinishime qýana-qýana kelisti. 13 mamyrda páter daiyn boldy, biraq jihazdy ákelmedi. Ol kelesi kúni bári jasalatynyn aitty, biraq ýádeleri sozyla bastady. Sodan keiin qońyraýlar men habarlamalarǵa jaýap bermei qaldy. Aiaǵynda ashýlanyp, joq degende daiyn jihazdyń sýretterin jiberýin suradym. Jaýap almaǵasyn, áieline habarlastym. Ol ne bolyp jatqanyn bilmeitinin jáne anyqtaýǵa tyrysatynyn aitty", - dedi ol.
Aldaiarovanyń aitýynsha, ol jihazdy tek maýsymnyń basynda ala bastaǵan. Jihaz jinaityn mamandar ony bólikterge bólip ákelgen: aldymen jaqtaý, sodan keiin esikter jáne t.b.
"Kelisim boiynsha, eń aldymen olar as úi jiyntyǵyn ákelýi kerek edi. Biraq shkaftardan bastady. Birinshi jaqtaýyn ákelip ornatty. Sonymen qatar, birneshe bólikke bólip ákeldi: bir kelgende - shkaftyń jartysy, taǵy bir aptada nemese 10 kúnde basqa bóligin degen sekildi. Sapasy týraly úndemeimin, jihazdyń jaǵdaiy óte nashar: búlingen, durys kesilmegen. Men oǵan da kóndim. Tek jihazdy jinap berse boldy dedim. Biraq jihaz jinaityndar ony da istemedi.
Árine, osy ýaqyt ishinde Safari Mebel direktory júikemizdi juqartty. Ol bizdiń jihaz daiyn ekenin aitty, biraq jihaz jinaityn mamandar joq ekenin, olar basqa nysanda jumys istep jatqanyn, bosaǵannan keiin bizge keletinin jetkizdi. Meniń oiymsha, ol osylaisha ýaqyt sozdy. Sirá, bul kóp adamdy tartý úshin jasaldy. Sebebi birdeńe durys emes ekenin sezdim", - dedi áiel.
Osydan keiin almatylyq kelinshek kúieýimen birge osy kompaniianyń jihaz tsehyna barǵan. Bul byltyr shildede bolǵan. Biraq olar kútpegen jaǵdaiǵa tap bolǵan.
"Amanjol Smaǵulovtyń tsehynda bizdiń jihazdardan múldem eshteńe bolǵan joq. Ol ózi ol jerge kelmedi. Sodan keiin bul Safari Mebel-diń menshigindegi nysan emes ekenin bildik. Bul tek jalǵa alynǵan jer eken. Bul sheberhana emes, jihazdyń keibir bólshekteri saqtalǵan qoima bolyp shyqty. Shoshyp kettik", - dedi ol.
Sodan keiin Aldaiarova Safari Mebel direktoryna shart buzylǵandyqtan sotqa júginý týraly jazbasha eskertý jibergen. Ol osy qaǵazdan keiin taǵy 10 kún suraǵan.
"Ol 30 shildede qaǵazǵa qol qoiyp, osy merzimge deiin jihazdy ákeletinin aitty. Ol tipti tapsyrysymyzdy aiaqtaý úshin aqsha joq ekenin ashyq aitty, sondyqtan qazir ol jańa tapsyrys alyp, klientter aldyn ala tólegennen keiin bizdikin aiaqtaitynyn jetkizdi. Men tańǵaldym.
Biraq tamyzda da, qyrkúiekte de jihaz daiyn bolmady. Sol kezde batyl sheshim qabyldadym. Alaida Smaǵulovtyń áieli bizdiń úige kelip, ónimniń sapasyn kórip, onyń jaǵdaiy nashar ekenine kelisti. Ol júkti ekenin aitty jáne kúieýi tapsyrysymyzdy aiaqtaýy úshin taǵy bir jarym ai surady. Adami turǵydan onyń jaǵdaiyn túsindim", - dep atap ótti ol.
Almatylyq 8 qazanǵa deiin óz tapsyrysyn ala almai, sotqa aryz bergen.
"Smaǵulov ta, áieli de qońyraýlarǵa jaýap bermedi. Ol tipti qaida barsam da, eshteńe istei almaitynymdy aitty. Alaida meniń ótinishimnen keiin osy alaiaqtardyń qurbandary maǵan habarlasa bastady. Meniń nómerimdi Safari Mebel-diń jihaz jinaityn mamandary bergen. Direktory olarǵa keiingi jarty jylda jalaqy tólemegen: bireýge 800 myń, bireýge 900 myń teńge", - dep qosty Aldaiarova.
Basqa zardap shekkenderdiń aitýynsha, Amanjol Smaǵulov olarmen 2021 jyldyń naýryzyna deiin kelisim jasaǵan. Sondai-aq, olarǵa da jihazdy aiaǵyna deiin jasap bermegen. Barlyǵy 30-dan asa adam jinalǵan.
"Bireý 11 million teńge, bireý-bes million teńge kóleminde aldyn ala tólem jasady. Mende jihazdyń bir bóligi bar, biraq eki million tólep, al alty aidan asa ýaqyt ótse de, eshteńe almaǵan adam bar. Keibireýlerinde meniki siiaqty jaǵdai: jihazdyń bir bóligi ǵana ornatylǵan, sapasy nashar", - dep qorytyndylady Aigúl Aldaiarova.
Ánshi Búrkit te (shyn esimi Aibek Janseiitov) oqiǵaǵa qatysty pikir bildirdi. Onyń sózinshe, Safari Mebel-men seriktes bolýdy kompaniia direktory Amanjol Smaǵulov usynǵan.
"Bir jarym jyl buryn Instagram arqyly ótinish jasady. Tapsyrysqa jihaz jasap bere alatynyn aitty. Úige jihaz qajet bolǵandyqtan kelistik. Barter retinde kelistik: olar bizge balalar bólmesine jihaz jasap beredi, al biz Instagram arqyly jarnama jasap beremiz. Artynsha Amanjol esimdi jigit úige kelip, bárin ólshep, bir aidan keiin daiyn bolatynyn aitty", - deidi ánshi.
Onyń sózinshe, kelisken ýaqytta jihaz daiyn bolǵan. Búrkit pen Aishaǵa jihaz sapasy unaǵan, sondyqtan Safari Mebel týraly Instagram-paraqshalarynda jarnama jasaǵan. Birneshe aidan keiin ánshi taǵy da sol jihaz kompaniiasyna júgingen.
"Basqa bólmege jihaz jasap berýlerin suradym. Ol tapsyrys kóp bolǵandyqtan keiinirek jasap beretinin, qoly bosaǵannan keiin kelip ólshep ketetinin aitty. Biraz ýaqyttan keiin jigitter keldi, biz ne qalaitynymyzdy kórsettik. Kelisimge kelgennen keiin olar ketti. Sol ýaqyttan beri jihazymyzdy jasap jatyr. Odan beri bir jyldan asa ýaqyt ótti.
Olarǵa hat jazsam, jaqynda jasap beremiz dep jaýap beredi. Biraq qazir olardan úmit az. Ne bolyp jatqany jáne nege bárin keshiktirip jatqanyn túsinbeimiz. Bálkim, biz jaqsy jarnama jasaǵannan keiin olarda klient kóp shyǵar. Menińshe, olar kóp tapsyrys alyp, bárin oryndai bermeidi. Biraq jumys pen sapa jaǵynan Safari Mebel kompaniiasyna eshqandai shaǵym joq. Jihazdar tamasha, balalar riza", - dep qosty ol.
Politsiia Safari Mebel basshysy qamaýǵa alynǵanyn aitty. Oǵan qatysty Qylmystyq kodekstiń 190-baby 3-bóliginiń 4-tarmaǵy "Birneshe ret jasalǵan alaiaqtyq" boiynsha sotaldy tergeý amaldary júrgizilip jatyr. Er adamǵa bas bostandyǵyn shekteý nemese múlki tárkilenip, úsh jyldan jeti jylǵa deiin bas bostandyǵynan aiyrý jazasy kesilýi múmkin.
"Safari Mebel direktorynyń jáne basqa da tulǵalardyń alaiaqtyq deregi - olardyń áleýmettik jelide óz qyzmetin jarnamalaý arqyly tutynýshylardy tartýy. Jarnamany kórgen azamattar qyzmettiń ashyqtyǵyna kúmán keltirmei, olarmen bailanysqa shyqqan. Senimge ie bolý úshin kúdiktiler naqty tapsyrys boiynsha ólshem júrgizip, aldyn ala tólem alǵan, tipti jihazdardy jasaý jáne ornatý boiynsha kelisimsharttar jasaǵan. Nátijesinde, aldanǵan azamattar jihaz almaǵan. Al olar tólegen somany qaitarmaǵan",- dedi Almaty qalalyq PD bastyǵynyń orynbasary Rýstam Ábdirahmanov.
Onyń aitýynsha, 30-dan asa azamat ótinishpen júgingen. Qazir jalpy materialdyq shyǵyn 32 million teńgeden asady.
"Osy tulǵalardyń qylmystyq áreketinen zardap shekken azamattardy 8-777-250-68-37 - Erǵali Ibraimov jáne 8-701-624-28-24 - Qairat Qasymbaev telefondary arqyly habarlasýdy suraimyz", - dedi Ábdirahmanov.
