Qazaqstandyq jas veloshabandoz Evgenii Gidich «Horvatiia týrynyń» 3-shi kezeńiniń jeńimpazy atandy. Jarystar aýa raiyna bailanysty qysqartylǵan edi, dep habarlaidy "Ult aqparat" Sports.kz-ke silteme jasap.
«Bizdiń bul kezeńge jaqsy josparymyz bar edi, nátijesinde bári oidaǵydai ótti. Shyndyǵynda, jańbyr, jel, sýyq, jarystyń toqtatylýy, sondai-aq qaita jalǵasýy saldarynan bul kún óte aýyr boldy. Biraq biz sport direktorlarynyń jáne ujymnyń barlyq qyzmetkerleriniń keremet jáne úilesimdi jumysynyń arqasynda barlyǵynan úlken qiyndyqsyz óttik. Báseke qaita bastalǵannan keiin biz jaǵdaidy baqylap, únemi alda júrýge tyrystyq. Sońǵy kezeńde men Davide Vilella men Andrei Zeitske qosylyp, kóshbasshylar tobyna oraldym. Jigitter sońǵy shaqyrymdarda maǵan úlken qoldaý kórsetti, al Davide qorytyndy shaqyrymda meni alyp shyqty. Men bul jeńisime óte rizamyn. Jeńiske jettim-aý! Barlyq joldastaryma bul aýyr ári keremet kún úshin alǵysymdy bildiremin. Bul – ortaq jeńis!», - dedi Evgenii Gidich.
Úshinshi kezeń Okrýg qalasynda bastaldy, alaida 20 shaqyrymnan keiin jarys komissarlary kezeńdi aýa raiynyń jeldi bolýyna bailanysty ony toqtatýǵa sheshim qabyldady. Jarys biraz ýaqytqa keiinge shegerilip, Makarska qalasynan márege deiin 43 shaqyrym jerde qaita bastaldy.
«Aýa raiy óte qaýipti boldy, sondyqtan tóreshilerdiń jarysty toqtata turyp, ornyn aýystyrý týraly sheshimderi durys edi. Biz shabandozdardy jańa jerge ákelip, jyldam 40-50 minýtqa jattyǵý uiymdastyryp jiberdik, sondyqtan sportshylarymyz jarysty jańartýǵa tolyqtai daiyn boldy. Biz bul maýsymnyń sońynda taǵy bir ádemi jeńiske qol jetkizgenimiz úshin rizamyz jáne osy jeńisimizdi demeýshilerimizge, sonyń ishinde, bas áriptes «Samuryq-Qazynaǵa» arnaǵymyz keledi», - dedi «Astananyń» sporttyq direktory Sergei Iakovlev.
Bul jeńisiniń arqasynda Evgenii Gidich «Horvatiia týrynyń» úzdikteri qataryna endi. Ol Aleks Edmondsty 6 sekýndqa, Greg Boleni 10 sekýndqa artqa tastady. Al Andrei Zeits pen Davide Villella sáikesinshe 10 jáne 11 oryndarǵa ornalasty. «Astana» jalpy komandalyq esepte alda kete jatyr. «Horvatiia týrynyń» tórtinshi kezeńi búgin Starigradadan Gorski-Kotarǵa deiingi 155 shaqyrymda ótetin bolady.
