QR BǴM biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakariia qazaqstandyq vaktsinanyń artyqshylyqtaryn aityp berdi, dep habarlaidy QazAqparat.
«Otandyq vaktsinanyń parametrleri boiynsha mynany málimdeimin: vaktsina senimdi, ýaqytsha ázirleý tehnologiiasymen tekserilgen. Ondaǵy barlyq komponentter sońǵy 60 jyl ishinde zerttelgen jáne qaýipsiz. Jańa komponent – buǵan deiin aitqanymyzdai, SARS-CoV-2 virýsynyń ózi. Bizdiń tehnologiiamyzdaǵy virýs himiialyq jolmen «óltirilgen» (inaktivtendirilgen). Immýndyq reaktsiiany kúsheitý úshin oǵan adiývant (aliýminii tuzdary) qosylady», - dedi K. Zakariia Ortalyq kommýnikatsiialar qyzmetinde ótken baspasóz máslihatynda.
Spiker koronavirýsqa qarsy qazaqstandyq vaktsinany ázirleýdegi tehnologiianyń artyqshylyqtaryn atady.
«Vaktsinany ázirleýdegi inaktivtendirilgen tehnologiianyń artyqshylyǵy –tehnologiia jyldar boiy tekserilgen, barlyq komponentter senimdi jáne qaýipsiz. Olar vaktsinamen bailanysqan aýrýlardy týdyrmaidy jáne gýmoraldy, jasýshalyq immýnitetti senimdi túrde qozdyrady. Aiyryqsha erekshelikteri – kúrdeli tehnikany, kúrdeli tońazytqysh qondyrǵylardy talap etpeitin jetildirilgen jetkizý ádisteri bar jáne tońazytqyshta pliýs 2-8 gradýs temperatýrada tasymaldanady», - dep túsindirdi ǴZI bas direktory.
Sonymen birge, K. Zakariia eki komponentpen egilgennen keiingi aǵzadaǵy antidenelerdiń quramy boiynsha aldyn ala derekterdi baiandady.
«Klinikalyq zertteýlerdiń birinshi jáne ekinshi fazalarynyń nátijesi boiynsha QazCOVID-in vaktsinasyn alǵan adamdarda birinshi vaktsinadan keiin 2-den 16-ǵa deiingi titrde virýsty beitaraptandyratyn antidenelerdiń paida bolýy baiqalady. Ekinshi vaktsinadan keiingi deńgei turaqty ósýde. Ortasha geometriialyq titr – 99,5. Osylaisha, qazaqstandyq vaktsinanyń joǵary imýnnostimýliatsiialyq belsendiligin kórýge bolady», - dedi Kúnsulý Zakariia.
