QR DSM Qoǵamdyq densaýlyq saqtaý ulttyq ortalyǵynyń ǵylymi keńesshisi Álim Ákimbaev qazaqstandyq Qaz Covid-in vaktsinasynyń artyqshylyqtaryn aityp berdi, dep habarlaidy QazAqparat.
«Biz qazir de úlken joldy eńserdik. Endigi mańyzdy kezeń – vaktsinalaýdy qoldaný. Vaktsina alyndy, endi vaktsinalaýdy durys uiymdastyrý kerek. Maska rejimi men qashyqtyq talaby áli de saqtalady. Ásirese juqpaly aýrýlar aýrýhanalarynyń dárigerlerin, epidemiologiialyq qyzmetti, naýqastarmen eń kóp bailanysta bolatyn adamdardy immýndaý qajet. Resei birinshi kezeńde bizge óte joǵary álemdik reitingke ie «Spýtnik V» vaktsinasyn usyndy. Jaqyn arada bizdiń otandyq vaktsina da shyǵarylýy tiis», - dep atap ótti Á. Ákimbaev Ortalyq kommýnikatsiialar qyzmetinde ótken baspasóz máslihatynda.
Sarapshynyń ózi qazaqstandyq vaktsinaǵa basymdyq berip otyrǵanyn aitty.
«Patriot retinde emes, vaktsinalaýmen ainalysqan maman retinde qazaqstandyq vaktsinaǵa kóbirek mán beremin dep aita alamyn. Nege? Jasalýy jaǵynan bul – óltirilgen, belsendi emes vaktsina. Ol saqtaý jáne tasymaldaýdyń arnaiy temperatýrasyn qajet etpeidi. Mundaǵy rejim ekiden segiz gradýsqa deiin. Iaǵni, vaktsinany saqtaý úshin qarapaiym turmystyq tońazytqyshty da qoldanýǵa bolady. Mundai tizbek Qazaqstanda ortalyqtan shalǵai óńirge deiin qolǵa alynǵan. Sondyqtan, 20 gradýs temperatýrada saqtaýdy talap etetin reseilik vaktsinadan tiimdi bolyp tur. Óitkeni mundai temperatýrada únemi saqtaý qoldan kelmeýi múmkin. Al temperatýra talabyn buzý sapanyń tómendeýine yqpal etedi», - dep túsindirdi maman.
Sonymen birge, Á. Ákimbaev qazaqstandyq vaktsinanyń antigendik jiyntyq spektri shektelmegenin jetkizdi, óitkeni tutas jasýsha alynyp, qandai da bir ádispen óltiriledi jáne antigenderdiń tolyq jiyntyǵy saqtalady.
«Qazir bul - óte ózekti, sebebi koronavirýs infektsiiasy týraly jańa stereotipter shyǵyp jatyr. Bul vaktsina koronavirýstyń barlyq mýtantty túrlerine immýnitetti qalyptastyrýy kerek. Mine, osy turǵyda qazaqstandyq vaktsinanyń perspektivasy bar», - dep túiindedi sarapshy.
