Májilis tóraǵasy Nurlan Nyǵmatýlin qazaqstandyq vaktsina shyǵarý boiynsha Jambyl oblysynda salynyp jatqan zaýytqa kimniń jaýapty ekenin synǵa aldy, dep habarlaidy QazAqparat.
«Ministrlikterdiń qaisysy bul zaýyt úshin jaýapty? Lentalary qiyldy, Aleksei Vladimirovich (Aleksei Tsoi – densaýlyq saqtaý ministri – red.) PR naýqanyn júrgizdi. Endi, zaýytta qashan ónerkásiptik óndiris bastalady? BǴM «meniki emes» dep otyr. Tsoi myrza «tek tutyný men uiymdastyrýdy» aitady. Sonda kim jaýapty?», - dedi Nyǵmatýlin Májilistiń jalpy otyrysynda.
Atalǵan jumystarmen ainalysyp júrgen Eraly Toǵjanov issaparda bolǵandyqtan, suraqqa Premer-Ministrdiń birinshi orynbasary Álihan Smaiylov jaýap berdi.
«Suraý Úkimetke salynatyn bolady. Úkimette Premer-Ministr orynbasary Eraly Toǵjanov ainalysyp júr. Ministrlikter arasynda – Bilim jáne ǵylym ministrligi. Qazir barlyq tehnikalyq jumystaryn ákimdik júrgizedi. Olar tehnikalyq bóligin bitirgen soń, Bilim jáne ǵylym ministrliginiń balansyna beriledi», - dep jaýap berdi Á. Smaiylov.
«Ázirge ózderińizge de túsiniksiz bolyp otyrǵanyn kórdik. Álihan Ashanuly (Smaiylov – red.), úlken ótinish, «qoishy kóp bolsa, qoi aram ólediniń» keri bolmasyn. Bul óte mańyzdy joba. Halyq, qoǵam vaktsinany kútip otyr. Qansha málimdeme jasalǵan soń, endi uiymdastyrýdy qolǵa alyńyzdar. Álihan Ashanuly Úkimettiń jaýapty ekenin aitty. Úkimette de naqty adamdar bar. Sizder suraǵan qarajat berildi. Endi taǵy qosymsha surap otyrsyzdar, taǵy bólinip jatyr. Bári ózderińizge bailanysty, ýaqyt jyldam, ótedi de ketedi», - dedi Nurlan Nyǵmatýlin.
