Otandyq immýndyq preparattar shyǵaratyn zaýyttyń synamalyq qosylýy maýsym aiyna belgilengen. Memleket basshysynyń qabyldaýynda Jambyl oblysynyń ákimi Berdibek Saparbaev osylai málim etti, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa óńirdiń biylǵy tórt aidaǵy damý qorytyndylary men Prezident tapsyrmalarynyń oryndalý barysy, sondai-aq, Jambyl oblysynda júzege asyrylyp jatqan jobalar men Qordai aýdanyndaǵy ahýal jóninde baiandaldy.
Berdibek Saparbaev qańtar-sáýir ailarynda Jambyl oblysynyń ónerkásip kórsetkishi 107,1 paiyzǵa, aýyl sharýashylyǵy 103,2 paiyzǵa, qurylys 110,3 paiyzǵa artyp, óńirge quiylǵan investitsiia 75,2 milliard teńgege jetkenin aitty. Sonymen qatar byltyr oblysta 768 myń gektar jerge egin egilse, biyl egistik alqap 46 myń gektarǵa ulǵaiǵan.
Oblystaǵy epidemiologiialyq jaǵdai da sóz boldy. Jalpy 2 580 tósek-oryn ázirlengen. Meditsinalyq qural-jabdyqtarmen qamtý tiisti dárejede júrgizilip, dárilik zattardyń jetkilikti qory qalyptasqan. Jospar boiynsha 582 myń azamatqa vaktsina salý kerek bolsa, búginde 100 myń adamǵa ekpe egilgen.
Aimaqta Prezident tapsyrmasyna sáikes ózge ult ókilderi tyǵyz shoǵyrlanǵan 25 eldi mekenniń etno kartasy jasaqtalǵan. Memleket basshysyna Qordai aýdanyndaǵy ahýal jóninde baiandaldy. Oblys ákiminiń aitýynsha, aýdandaǵy jaǵdai turaqty. Byltyr turǵyn úi, jol qurylysy, bilim berý, meditsina, mádeniet jáne sport salalary boiynsha jalpy quny 35,1 milliard teńge bolatyn 392 joba iske asyrylǵan. Barlyq zardap shekken nysandar men turǵyn úiler tolyǵymen qalpyna keltirilgen.
Gvardeisk aýylyndaǵy Biologiialyq qaýipsizdik problemalary jónindegi ǵylymi-zertteý institýtynyń bazasynda otandyq immýndyq preparattar shyǵaratyn zaýyttyń qurylys-montaj jumystary aiaqtalyp, tiisti qondyrǵylardy ornatý jumystary júrgizilýde. Zaýyttyń synamalyq qosylýy maýsym aiyna belgilengen.
Memleket basshysy oblystaǵy epidemiialyq ahýaldy baqylaýda ustaý, investitsiia tartý jáne memlekettik baǵdarlamalardy tiimdi júzege asyrý jumystaryn jandandyrý jóninde tapsyrma berdi.
