Eýraziialyq ekonomikalyq odaqtaǵy alǵashqy uzyn ólshemdi (120 m) temir jol relsterin shyǵarý zaýyty Resei naryǵyna temir jol ónimderin jetkizý týraly kelisimge qol jetkizdi, dep habarlaidy "Ult aqparat".
Rels-arqalyq ónimderdiń qazaqstandyq óndirýshisi «Aqtóbe rels-arqalyq zaýyty» JShS (ARBZ) jasasqan sharttyń sheńberinde aǵymdaǵy jyldyń sońyna deiin «Resei temir joldary» AAQ (RTJ) qajettilikteri úshin 50 000 tonna relsti jetkizý jumystaryn uiymdastyrady.
Shartqa sáikes ARBZ Resei Federatsiiasynyń temir joldaryn jóndeý jumystarynda paidalanýǵa arnalǵan uzyndyǵy 100 jáne 25 metr DT350 sanatyndaǵy R65 tipti temir jol relsterin eksporttaidy. Búgin 900 tonna kólemindegi relstiń alǵashqy partiiasy Resei Federatsiiasyna jóneltildi.
«Resei temir joldary» AAQ – jalpy uzyndyǵy 85,6 myń shaqyrymdy quraityn temir joldary bar álemdegi eń iri úsh temirjol kompaniiasynyń biri.
ARBZ qurylysy 2013 jyldyń sáýir aiynda bastaldy. Jobanyń jalpy quny 82,7 mlrd teńgeni qurap, qajetti qarjylandyrýdyń 70% deiingi kólemi «Qazaqstannyń Damý Banki» AQ («Báiterek» holdinginiń enshiles kompaniiasy, budan ári – QDB) tarapynan Qazaqstan Respýblikasyn údemeli indýstriialyq-innovatsiialyq damytý jónindegi 2010-2014 jyldarǵa arnalǵan memlekettik baǵdarlama sheńberinde jobany 10 jyldan 20 jylǵa deiingi merzimge qarjylandyrýmen usynyldy. Sondai-aq QDB jobany qurylystyń barlyq kezeńderinde: jobalaýdan bastap iske qosý sátine deiin súiemeldedi. QDB Siemens S.p.A-dan zamanaýi eýropalyq jabdyqty satyp alýǵa 47,7 mln eýro somasyna qaryz, sondai-aq Jobany júzege asyrýǵa 66,8 mlrd teńge somasyna qaryz berdi. Birlesip qarjylandyrýshy bank retinde «Resei Jinaq banki» AQ EB-da qatysqan.
Qazirgi ýaqytta «ARBZ» JShS – EAEO-daǵy jobalyq qýaty 200 myń tonna relsti jáne 230 myń tonna prokatty quraityn uzyndyǵy 120 metrge deiin jetetin termobeiimdelgen uzyn ólshemdi relsterdiń jetekshi óndirýshileriniń biri. Aýmaǵy 78,9 ga bolatyn zaýytta 800-den astam jumysshy eńbek etedi. Zaýyt jalpy temir jol qurylysy úshin de, joǵary jyldamdyqty magistraldar úshin de relster shyǵarady. Onyń ónimderi Qazaqstan, Ýkraina, Resei jáne Eýropanyń ulttyq standarttary boiynsha sertifikattalǵan.
2016 jyldan bastap qazaqstandyq temir joldardy salý jáne jóndeý barysynda 400 myń tonnadan astam ARBZ ónimi paidalanylǵan, bul shamamen 3 myń shaqyrymdy quraidy. Zaýyttyń relsteri Resei, Ýkraina, Estoniia, Latviia, Belarýs, Ózbekstan, Qyrǵyzstan, Grýziia, Túrikmenstan, Aýǵanstan jáne Túrkiia elderinde qoldanylady.
Resei temir joldary úshin relsterdiń prokaty Aqtóbe rels-arqalyq zaýytynyń strategiialyq seriktesi bolyp tabylatyn RF-tyń iri taý-ken metallýrgiialyq holdinginiń biri – «Metalloinvest» quramyna kiretin «Oskol elektr metallýrgiialyq kombinaty» AQ-tyń óndiris daiyndamalarynan júzege asyryldy.
«Sońǵy jyldary qazaqstandyq mashina jasaý salasynyń damý qarqyny turaqty ósip keledi jáne Aqtóbe rels–arqalyq zaýyty ol salaǵa aitarlyqtai úles qosýda. Aqtóbe rels–arqalyq zaýyty, Qazaqstan Damý Bankiniń, greenfield jobasy bolyp tabylady.
Búgin bul joba damýdyń senimdi vektoryn kórsetip, óndiretin ónimin tek Qazaqstan naryǵyna jetkizip qana qoimai, sonymen qatar TMD elderine eksporttaýda» - dedi QDB Klienttermen jumys isteý jónindegi direktsiiasynyń aǵa bankiri Qasym Muhanbetov.
Búgingi kúni Aqtóbe rels-arqalyq zaýyty eýropalyq naryqqa temir jol relsteriniń ekporty boiynsha jumys júrgizip jatqanyn jáne osy maqsatta ótken jyldyń qarasha aiynda TÜV Rheinland-tyń EN 13674-1:2017 standarty boiynsha eýropalyq úlgidegi 60E1 temir jol relsterin óndirýge sertifikatyn alǵanyn atap ótken jón. Relsterdiń bul túri Eýropalyq Odaq, Baltyq jaǵalaýy elderinde, sondai-aq Taiaý Shyǵys pen Soltústik Afrikada qoldanylady. Atalǵan sertifikat qazaqstandyq rels-arqalyq ónimderdi ótkizý geografiiasyn keńeitýge múmkindik beredi. Qazaqstan úshin ádettegi R65 relsterinen 60E1 relsteri tehnikalyq parametrleri: relstiń biiktigi, moiynynyń biiktigi men qalyńdyǵy, bastieginiń eni boiynsha erekshelenedi.
Sonymen qatar Aqtóbe rels-arqalyq zaýyty DSTÝ 4344:2004 boiynsha shyǵarylǵan 1 sanatty R65 tipti temir jol relsteriniń óndirisin igerdi. Osy jumystardyń nátijesinde naýryz aiynda sáikestik sertifikaty alyndy, atalǵan sertifikattyń bolýy Ýkraina aýmaǵynda rels ónimderin satýdyń qajetti talaby bolyp tabylady.
Atalǵan is-sharalar kásiporynnyń da, Qazaqstan Respýblikasynyń da eksporttyq áleýetin arttyrýǵa baǵyttalǵan. «Aqtóbe rels-arqalyq zaýyty» JShS jańa ónimniń kommertsiialyq óndirisine daiyn.
