Grek-rim kúresinen ulttyq qurama balýany Almat Kebispaevtyń basy daýǵa ilikti. Ol 6 qyrkúiekte Almatydaǵy saýda oryndarynyń birinde er adamdy soqqyǵa jyqqan, - dep habarlaidy Massaget.kz portaly Krisp Almaty paraqshasyna silteme jasap.
Áleýmettik jelidegi paraqshaǵa oqyrmandarynyń biri hat jazǵan. Onyń aitýynsha, qyzynyń týǵan kúnin atap ótip júrgende oiyn alańyndaǵy balalar arasynda kelispeýshilik týyndaǵan. Aldymen bir áiel kelip, kishkentailarynyń tártibin baqylaýdy surasa, artynan eki jigit kelgen. Biri ony balalardyń kózinshe betinen uryp qulatqan.
Krisp Almaty aqparaty boiynsha, urǵan azamat - tanymal balýan Almat Kebispaev. Ol álem chempionatynda 5 ret (2 kúmis, 3 qola) júlde alǵan, 2 ret Aziia chempionatynda top jarǵan.
Jábirlenýshi politsiiaǵa shaǵym jazǵan.
Al Almat Kebispaev qazirgi tańda Belgradtaǵy álem chempionatynda. Aldaǵy kúnderi 67 kiloǵa deiingi salmaqta boz kilemge shyǵady. Saýda úiindegi oqiǵadan keiin onyń áleýmettik jelidegi paraqshasyna teris pikir qaldyrǵan qoldanýshylar sany artqan.
Buǵan deiin dál osyndai oqiǵa Astanada kásipqoi boksshy Beibit Shúmenovtiń qatysýymen bolǵan. Ol kezde de sportshy balalar arasyndaǵy daý kezinde jábirlenýshini soqqyǵa jyqqan bolatyn.
