Qazaqstandyq strit-art sýretshi Pasha Kas Gonkongta shyǵatyn Forbes Asia jýrnalynyń jas kóshbasshylar tizimine ("30 Under 30") endi.
Jýrnaldyń jazýynsha, 3500 nominanttyń arasynan 30 jasqa deiingi álemdi ózgertýge daiar, jańashyl ártúrli salada isteitin 300 adam iriktelinip alynǵan.
Tizimdi qurastyrýshylar 25 jastaǵy Pasha Kasty áleýmettik máselelerge qoǵam nazaryn aýdartý úshin provokatsiialyq ádisterdi paidalanatyn sýretshi dep ataidy. Mysaly, sýretshi sýitsid máselesine nazar aýdartý úshin Almatydaǵy jarnama bilbordtarynyń birine maneken ilip qoiǵan.
Qazaqstan boiynsha aýasy eń las sanalatyn Temirtaý qalasynda 2016 jyly ekologiia máselesine nazar aýdartý úshin kóp qabatty ǵimarattyń qabyrǵasyna 15 metrlik graffiti salǵan.
Sol jyly shyǵarmashylyq týyndylarynyń birin Qazaqstan aýmaǵynda iadrolyq qaldyqtardy kómý máselesine arnap, Semeidegi burynǵy iadrolyq poligon aýmaǵynda Edvard Mýnktiń "Krik" kartinasyn qabyrǵaǵa túsirdi.
"Qazaqstan 21 ǵasyrda iadrolyq qaldyq tógetin orynǵa ainalyp bara jatyr. Memleket adamdarǵa synaq jasaýyn tyiar emes. Bul - únsizdik. Úrei. Toryǵý. Qylmys" dedi sýretshi sol kezde.
Pasha Kastyń shyǵarmashylyq týyndylary Qazaqstannan bólek ózge memleketterde de kezdesedi.
2019 jyly sýretshi Niý-Iorktegi jaiaý júrginshiler jolyna aq tústi boiaýmen adam keskinin salyp qoiǵan. Osylaisha megapolisterdegi adamdardyń "nemqurailyǵyn" jetkizýge tyrysqan.
Byltyr Pasha Kastyń Peterbýrgtegi týyndysy "qoǵamdyq keńistiktegi óner" nominatsiiasy boiynsha Kýrehina syilyǵyna ie boldy. Sýretshi bul jeńisin almatylyq belsendiler Beibarys Tolymbekov pen Ásiia Tólesovaǵa arnady. Beibarys pen Ásiia byltyr sáýir aiynda marafon kezinde "shyndyqtan qashyp qutyla almaisyń" degen jazýy bar banner ilgeni úshin 15 kúnge qamalǵan. Olardy politsiia "beibit jiyn ótkizý tártibin buzdy" dep aiyptady. Bul aktsiiadan keiin Qazaqstannyń túkpir-túkpirinde jastardy qoldaǵan túrli aktsiia ótti. Chehiia, Frantsiia, Ulybritaniia, Grýziia, Italiiadaǵy stýdentter eki belsendini bosatýdy talap etip, aktsiia ótkizgen.
