Semei iadrolyq poligonynyń qurbany, sýretshi Káripbek Kúiikov Londonda jeke sýret kórmesin ótkizdi.
Aita keterligi, Káripbek Kúiikov osydan alty jyl buryn «saýsaq izderi joq» degen jeleýmen Birikken Koroldikke kirýge viza ala almaǵan edi. Osyǵan bailanysty, týa bitti eki qoly joq qoǵam qairatkerinen Ulybritaniia elshiligi keshirim surap, olqylyqtyń orny endi tolyp otyr, dep habarlaidy QazAqparat.
Káripbek Kúiikov iadrolyq synaqtardyń úrei týdyrar aýyr zardaptary beinelengen sýretterin Britaniia jurtshylyǵyna usynyp qana qoimai, halyqty iadrolyq synaqtarǵa tyiym salýǵa baǵyttalǵan ATOM jobasynyń onlain-petitsiiasyna qol qoiýǵa shaqyrdy.
«London - búkil halyq qulaq asatyn álem astanalarynyń biri. Osynda aitylǵan pikirler álem jurtshylyǵynyń nazaryna iligedi», - dedi óz sózinde sýretshi.
Birikken Koroldiktiń Qaýymdar palatasy ǵimaratynda jáne Koroldik avtomobilder klýbynda ótken kórmelerge britaniialyq depýtattar, Qazaqstan men Ulybritaniia diplomatiialyq korpýsynyń, buqaralyq aqparat quraldarynyń ókilderi qatysty. Onda «Iadrolyq qarýsyzdaný úshin kampaniia» uiymynyń bas hatshysy Keit Hadson Qazaqstannyń iadrolyq qarýǵa tyiym salý týraly shartty ratifikatsiialaýyn uly jetistik dep baǵalady.
«Bul bastama qarýsyzdaný qozǵalysyna úlken serpilis ákeldi», dedi ol sózinde.
Al Ulybritaniia Parlamenti Lordtar palatasynyń múshesi jáne «Parlamentariiler iadrolyq qarýdy taratpaý jáne joiý úshin» uiymynyń teń tóraǵasy Baronessa Siýzan Miller iadrolyq qarýdy synaýdyń qaýip-qateri men saldaryn álem jurtshylyǵyna jetkizýdegi Qazaqstannyń rólin airyqsha atap ótti. Ol ásirese, Káripbek Kúiikovtyń jeke basynyń taǵdyry men ólsheýsiz eńbegin erekshe atap ótti. Ulybritaniia Parlamenti Qaýymdar palatasynyń depýtaty Bob Stiýart bolsa, Káripbek Kúiikovtyń aýyrtpashylyqqa tótep berip, iadrolyq qarýǵa tolyq tyiym salý ideiasyn nasihattap júrgendigin úlken erlik, dep baǵalady.
Sýretshiniń shyǵarmashylyq sapary Shotlandiianyń astanasy Edinbýrgte de jalǵasty. Káripbek Kúiikov jergilikti Parlamentte sóz sóilep, álemdi beibitshilikke úndedi. Shotlandiianyń birinshi ministriniń orynbasary jáne bilim ministri Djon Sýinnmen kezdesti. Sondai-aq ol Manchesterde de jeke kórmesin ótkizip, Lord-qala meri Abid Latif Chohanmen didarlasty.
