Parij Olimpiadasynyń bastalýyna tórt kún qaldy. Qazirgi tańda qazaqstandyq delegatsiia ókilderi Parijdegi Olimpiadalyq qalashyqqa jaiǵasyp jatyr. Tórtjyldyqtyń basty sporttyq oqiǵasy qarsańynda Olympic.kz ulttyq qurama sportshylarynyń qazirgi jai-kúiimen tanystyrady.
Olimpiadalyq quramadan alǵash bolyp sadaq atýdan Qazaqstan quramasy olimpiadalyq aýylǵa jaiǵasty. Ilfat Abdýllin ekinshi, Dáýletkeldi Jańbyrbai men Aleksandr Eremin birinshi Olimpiadasyna qatysý úshin Parij tórinde daiyndalýda.
Sondai-aq, qazaq jankúierleri jekpe-jegin asyǵa kútetin otandyq boksshylar Parijge ushyp keldi. Myrzaǵali Aitjanov pen Eldos Saidalin jattyqtyratyn ulttyq qurama sportshylary búginde olimpiadalyq aýylmen tanysýda. Bas bapker Myrzaǵali Qulanulynyń aitýynsha, qazir komanda músheleri mundaǵy kún raiyna beiimdelip jatyr.
«Olimpiada oiyndaryna qatysý úshin Parijge aman-esen jettik. Olimpiadalyq aýylǵa ornalasyp, aýa raiyna, ýaqyt aiyrmashylyǵyna beiimdelip jatyrmyz. Búgin jattyǵýdy bastaimyz.
Keshe ainalamyzdy baqylap, ornalasyp, fitnes-zaldardy kórip, bárin bir baiqap aldyq. Olimpiadalyq aýylǵa bir kún túnep te úlgerdik. Aýa raiyn salqyndaý. 25 shilde jerebe tartylsa, 27 shilde kúni jarys bastalady», - deidi bas bapker Aitjanov.
Olimpiadalyq aýylǵa ornalasqan sportshylar qatarynda 27 shildede jarys jolyna shyǵatyn taǵy bir atletterimiz – Nariman Kýrbanov pen Milad Karimi de bar. Qazirgi tańda sportshylar jattyǵý jumystaryna kirisip ketti.
Olimpiadanyń alǵashqy jarys kúninde synǵa túsetin taǵy bir ókilderimiz – dziýdoshylar. 27 shilde kúni erler arasynda 60 keli salmaqta Eldos Smetov, áielder arasynda 48 keli salmaqta Abiba Ábýjaqynova el namysyn qorǵaidy.
Biraq dziýdoshydar olimpiadalyq aýylǵa áli qonystanǵan joq. Dziýdodan Qazaqstan quramasy Frantsiiada Olimpiada aldyndaǵy sońǵy oqý-jattyǵý jiynyna qatysyp jatyr.
Qazirgi tańda dziýdoshylar Frantsiianyń Mez qalasynda arnaiy baǵdarlama boiynsha Olimpiadaǵa daiyndyqtaryn pysyqtaýda.
Aita ketelik, Parij Olimpiadasynyń 26 shilde men 11 tamyz aralyǵynda ótedi.
Jazǵy oiyndarǵa Qazaqstan sapynan sporttyń 25 túrinen 80 atlet qatysady.
