.jpg)
Dástúrli sadaq atýdan ulttyq qurama sportshylary osy kúzde Astanada ótetin 5-shi Dúniejúzilik kóshpendiler oiyndaryna degen daiyndyqtaryn qyzdyra tústi. Sadaqshylar dúbirli dodada saiys ótetin alańda, iaǵni «Qazanat» ippodromynda sheberlikterin shyńdap jatyr, dep habarlaidy "Ult aqparat" QR Ulttyq sport qaýymdastyǵynyń baspasóz qyzmetine silteme jasap.
Dástúrli sadaq atýdan ulttyq qurama bas bapkeri Dias Ahmetovtiń aitýynsha, búginde DKO aiasynda ótetin dástúrli sadaq atý saiysyna qatysýǵa 35 memleketten ótinish túsken.
«Qazir akkredatsiia jumystary júrgizilip jatyr. Bairaqty básekede Túrkiia, Malaiziia, Qyrǵyzstan, Vengriia, Resei syndy memleketterdiń sadaqshylary jaqsy óner kórsetetini belgili. Degenmen, bizdiń sportshylarymyz ózderiniń myqtylyǵyn dáleldeitinine senimdimin», - deidi ol.
Kóshpendiler oiyndaryna degen daiyndyqtary jaily dástúrli sadaq atýdan ulttyq qurama músheleri de aityp berdi.
«Bul báseke bizdiń alańda ótetin bolǵandyqtan moinymyzda zor jaýapkershilik bar ekenin bilemiz. Al saiys ótetin alańda jattyǵý biz úshin jaqsy múmkindik. Óitkeni bul jerdi tolyq zerttep, klimatyn, jel jyldamdyǵyn, nysananyń ornalasýy syndy mańyzdy tusttardy túrtip alyp jatyrmyz», - dep atap ótti sadaq atýdan ulttyq qurama múshesi Baqbergen Sálimov.
«5-shi Dúniejúzilik kóshpendiler oiyndarynyń bastalýyna óte az ýaqyt qaldy. Árine, biz daiyndyǵymyzdy qyzdyra tústik. Meniń oiymsha, bairaqty báseke elimizde ótetindikten, mindetti túrde kópshilikti altynmen qýantamyz», - deidi sadaq atýdan ulttyq qurama múshesi Ajar Rahmetqyzy.
Eske sala keteiik, Respýblikalyq «Dástúrli sadaq atý» federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báige», «Kókpar», «Teńge ilý», «Aýdaryspaq», «Jamby atý», «Qusbegilik», «Asyq atý», «JORYQ» at sporty jáne t.b. federatsiialar bar. QR Ulttyq sport qaýymdastyǵyn Islambek Saljanov basqarady.
Aita keterligi, 8-13 qyrkúiekte Astana qalasynda 5-shi Dúniejúzilik kóshpendiler oiyndary ótedi. Is-sharaǵa 89 elden 2000-nan astam sportshy qatysady dep josparlanýda. 5-shi Dúniejúzilik kóshpendiler oiyndarynyń Bas demeýshisi - ALAGEUM ELECTRIC, Oiyndardyń Bas seriktesi - Halyk Bank. Astanada ótetin Dúniejúzilik kóshpendiler oiyndarynda barlyǵy 21 sport túrinen 97 medal jiyntyǵy sarapqa salynady.
