Qazaqstandyq QazVac vaktsinasyn óndirý úshin biregei qurylǵy qoldanylýda. Bul týraly "Ult aqparat" BǴM baspasóz qyzmetine silteme jasap habarlaidy.
Kóptegen elderde vaktsina birinshi jáne ekinshi fazadan keiin ǵana paidalanýǵa beriledi. Qazaqstanda vaktsinany tereń ári muqiiat zerdeleý úshin klinikalyq zertteýlerdiń úshinshi kezeńiniń jartysy qosyldy.
«Nazardaǵy basty másele - ol adamdardyń densaýlyǵy. Biz Densaýlyq saqtaý ministrligimen kelisip, klinikalyq zertteýlerdiń úshinshi kezeńinde vaktsinanyń áserin tolyǵyraq zertteý úshin osyndai taktikany qoldandyq. Qazirgi ýaqytta vaktsina Biologiialyq qaýipsizdik problemalary ǵylymi-zertteý institýtynda Bilim jáne ǵylym ministrligi satyp alǵan qural-jabdyqtarmen óndirilip jatyr. Bul biregei qurylǵy. Eger mundai qurylǵy qolda bolmaǵanda, biz búgingidei tamasha nátije kórsete almas edik», - dedi QR BǴM Ǵylym komitetiniń Biologiialyq qaýipsizdik problemalary ǴZI bas direktory Kúnsulý Zakaria.
Qazaqstandyq ǵalymdar otandyq vaktsinany 2020 jyldyń 9 mamyrynda ázirlegenin aita ketken jón. Ol qaýipsiz tehnologiia boiynsha immýnostimýliator qosý arqyly óltirilgen virýstan jasaldy. 2020 jyldyń 17 qyrkúieginde 44 eriktiniń qatysýymen klinikalyq zertteýlerdiń I kezeńi bastaldy. Vaktsina qaýipsiz ekenin kórsetti. Eriktilerdiń jaǵdaiy qalypty boldy. 17 qazanda klinikalyq zertteýlerdiń II kezeńi bastaldy. Oǵan 200 volonter qatysty. Zertteý nátijeleri boiynsha vaktsina joǵary immýnogendilik pen tiimdiligin kórsetti.
19 jeltoqsanda Densaýlyq saqtaý ministrligi klinikalyq synaqtardyń qorytyndy III fazasyn júrgizýge ruqsat berdi. 3000 adam erikti bolyp, QazVac brendimen QazCovid-in vaktsinasy egildi. Vaktsina eriktilerge arasyna 21 kún salyp, 2 márte egildi. Nátijesinde olardyń qanynda qajetti qorǵanys antideneleri paida boldy. Eriktilerdiń jaǵdaiy jaqsy, shaǵymdary bolǵan joq. 2021 jylǵy sáýir aiynyń sońynda klinikalyq zertteýlerdiń III fazasynyń aralyq nátijeleri belgili bolady. Sodan keiin otandyq vaktsina jappai paidalanýǵa jiberiletin bolady.
Eske salsaq, QazSovid-in avtorlary vaktsinanyń 5 túrin ázirlegen.
