Foto: Halyqaralyq parapaýerlifting federatsiiasy
Qazaqstandyq parapaýerliftingshi David Degtiarev 2025 jylǵy álem chempionatynda jarqyn jeńiske jetip, úshinshi altyn medalin ielendi, dep habarlaidy Ult.kz.
Buǵan deiin ol 2021 jyly Tbiliside ótken álem chempionatynda alǵashqy altyn júldesin jeńip alǵan. Ekinshi altyndy 2025 jylǵy 14 qazanda Mysyrda ótken jarysta ielendi. Qazaqstan ýaqytymen keshki 18:00-den keiin oǵan úshinshi altyn medal tabystaldy.
Álem chempionatynda marapattar tek úzdik áreket úshin ǵana emes, úsh múmkindiktegi eńserilgen salmaqtyń jiyntyǵy úshin de beriledi. Osylaisha, Degtiarev 191 keli kóterip, kúnniń úzdik nátijesi úshin bir altyn medal, al 567 keli jiyntyǵy úshin ekinshi altyn medal jeńip aldy.
Nátijesinde, David Degtiarev úsh dúrkin álem chempiony atandy jáne bul kórsetkishimen Aziia rekordyn jańartty.
«Búgin úsh dúrkin álem chempiony atandym. Qarsylastar óte myqty boldy, ásirese Salvadordan kelgen jańa sportshy laiyqty básekeles boldy. Jarys óte tartysty ótti. Jeńis maǵan buiyrdy, óte qýanyshtymyn. Bapkerlerime jáne dostaryma sheksiz alǵysymdy bildiremin», – dedi sportshy jarystan keiin.
Aita keteiik, David Degtiarev — Paralimpiada oiyndarynyń da eki dúrkin chempiony.
Qazaqstan Paralimpiadalyq komitetiniń prezidenti Qairat Boranbaev bul jetistikterdi bylai dep baǵalady:
«Bizdiń parapaýerliftingshilerdiń jeńisi – júieli jattyǵý men sportshylardyń joǵary motivatsiiasynyń nátijesi. Qazaqstan quramasy halyqaralyq arenada tabysty óner kórsetip keledi».
Parapaýerliftingten álem chempionaty — Paralympic Powerlifting júiesindegi eń mańyzdy jarystardyń biri. Bul synda álemniń eń myqty sportshylary baq synaidy. 2025 jylǵy álem chempionatynda David Degtiarevten bólek, ózge qazaqstandyq sportshylar da joǵary nátije kórsetti:
Fariza Tóljan (50 kelige deiingi salmaq): 298 keli – altyn medal;
Raýshan Qoishybaeva (73 kelige deiin): 330 keli – altyn, ardagerler arasynda altyn jáne kúmis;
Rahmetjan Hamaev (88 kelige deiin): 592 keli – kúmis medal.
Chempionat Mysyrda ótip jatyr. Qazaqstan quramasynyń namysyn 17 sportshy qorǵaýda.
