Qazaqstandyq palýan Iýsýp Batyrmýrzaev Olimpiada joldamasyn enshilep, Aziia aimaqtyq irikteý týrnirinde chempion atandy, dep habarlaidy "Ult aqparat" oblystyq dene shynyqtyrý jáne sport basqarmasynyń baspasóz qyzmetine silteme jasap.
Erkin stildegi 125 kelide kúresken Iýsýp Batyrmýrzaev jartylai finalda Úndistannyń palýanymen kezdesti. Samit Samitpen ótken beldesý 2:0 esebimen aiaqtalyp, Iýsýp Batyrmýrzaev finalǵa shyqty.
«Beldesý qiyn boldy. Degenmen boz kilemde barlyǵyn baqylaýda ustaýǵa kúsh saldym. Eńbegim esh ketpedi. Samit esimdi palýanmen bir ai buryn Italiia jerinde ótken týrnirde kúresken edim. Sheber palýan. Ol kezdesýde 10:0 esebimen jeńdim. Bul joly jaqsy daiyndyqpen kelipti. Tegeýrindi qarsylasty», - deidi Iýsýp Batyrmýrzaev.
Iýsýp Batyrmýrzaev finalda Mońǵoliia eliniń sportshysy Lhagvagerelem Mýnhtýromen kúsh synasty. Alyptar aiqasy sońǵy sekýndqa deiin tartysty ótti. Boz kilemde senimdi kúresken aqtóbelik palýan 4:2 esebimen Aziia irikteý týrnirinde chempion boldy.
«Olimpiadaǵa joldama qorjynda dep arqany keńge salýǵa bolmaidy. Óz jerimizde ótkendikten Aqtóbe jurtyn altyn medalmen qýantqym keldi. Sol maqsatym oryndaldy. Maǵan senim artyp, qoldaǵan jandarǵa alǵys bildiremin. Bapkerler quramyna raqmet aitamyn. Litsenziia bizde, endi jyldyń eń mańyzdy saiysyna daiyndalamyz», - dedi palýan.
Aita keteiik, Iýsýp Batyrmurzaev 1996 jyldyń 13 sáýirinde dúniege kelgen. Aqtóbe oblysynyń namysyn qorǵap júr. 2020 jyly Aziia chempionatynda top jarǵan.
