QR Bilim jáne ǵylym ministri Ashat Aimaǵambetov fizika jáne lingvistika pánderinen ótken halyqaralyq olimpiadalardyń jeńimpazdaryn quttyqtady, dep habarlaidy "Ult aqparat".
«Bizdiń oqýshylar Qazaqstandy álemge tanytýdy jalǵastyryp jatyr. Olar fizika jáne lingvistika pánderi boiynsha halyqaralyq olimpiadalarda 6 medal jeńip aldy. Jas fizikter qurama qorjynyna 5 kúmis, lingvister 1 qola medal saldy», dep jazdy ministr Facebook-tegi paraqshasynda.
Fizika páninen olimpiada Litvada ótti. Qazaqstannyń atynan Nur-Sultan, Almaty, Atyraý jáne Pavlodar qalasynan bes oqýshy, iaǵni respýblikalyq pándik olimpiadanyń jeńimpazdary qatysty.
«Olar álemniń 76 elinen kelgen 400-ge jýyq oqýshymen baq synasty. Nátijesinde oqýshylarymyzdyń barlyǵy júldeli orynǵa ie boldy. Kúmis medal iegerleri – Raýan Qaldybaev, Anton Draganchýk, Dinmuhammed Rahymjanov, Rizabek Alpamys, Ersultan Pitebai», - dedi Ashat Aimaǵambetov.
Lingvistika páninen olimpiada Latviiada ótken. Oǵan Nur-Sultan, Shymkent, Taraz jáne Qaraǵandy qalalarynan 4 oqýshy qatysty.
Qazaqstan qurama komandasy respýblikalyq olimpiadanyń jeńimpazdarynan jasaqtaldy. Elordalyq oqýshy Daria Peresypkina qola medalǵa ie boldy.
«Sizderdi jańa jeńisterińizben quttyqtaimyn! Qazaqstandyq oqýshylar myqty daiyndyǵyn, bilimderiniń joǵary deńgeiin taǵy da dáleldedi.
Sizder óz qurdastaryńyzdyń arasynda fizika jáne lingvistika áleminde kóshbasshy bola aldyńyzdar.
Osyndai jetistikter qajyrly eńbektiń, shydamdylyq pen qaisarlyqtyń, birneshe jyldyq joǵary daiyndyqtyń nátijesi ekeni anyq. Bolashaqta sizderdiń esimderińizdi otandyq ǵylym áleminde kóretinimizge úmit artamyz. Sizderge jańa jetistikter tileimin!», - dedi ministr.
Ashat Aimaǵambetov oqýshylardyń ustazdaryn, ata-analaryn jáne jattyqtyrýshylaryn quttyqtady. Ol oqýshylardyń ǵylym álemin odan ári baǵyndyrýy men rekordtaryn jańartýy úshin jaǵdai jasaýdy jalǵastyratynyn atap ótti.
