Qyrǵyzstandaǵy Qarakól taý shańǵysy bazasynda qazaqstandyq jasóspirim mert boldy. Bul aqparatty QR Syrtqy ister ministrliginiń resmi ókili Aibek Smadiiarov rastady, dep habarlaidy "Ult aqparat".
«Qazaqstan konsýly qaza tapqan balanyń týystarymen jáne jergilikti quqyq qorǵaý organdarmen bailanysyp otyr. Balanyń ata-anasyna qajetti barlyq konsýldyq-quqyqtyq kómek kórsetiletin bolady. Aldyn ala málimetterge sáikes, otandasymyz shańǵymen syrǵanaý barysynda qaýipsizdik tehnikasy erejelerin saqtamaý saldarynan qaza tapqan», - dedi A.Smadiiarov.
Qyrǵyz eliniń 24.kg aqparat agenttiginiń málimetinshe, Nur-Sultan qalasynyń 35 jastaǵy turǵyny 13 jasar ulymen 3 qańtar kúni Qyrǵyzstannyń Shý oblysyna qarasty Toqmaq qalasynda turatyn nemere aǵasynyń úiine barǵan. 10 qańtar kúni qyrǵyzstandyq otbasymen jáne Qazaqstannan kelgen jienimen Qarakóldegi taý shańǵysy bazasyna demalysqa barǵan.
«12 qańtar kúni saǵat shamamen 13-00-de bala kótergishpen 3 myń 40 metr biiktikke shyǵyp, batys trassamen tómen qarai syrǵanaǵan. 2 700 metr biiktikte ol batys trassadan shyǵys trassaǵa buryla beriste shyrshaǵa soǵylǵan. Bala alǵan jaraqatynan oqiǵa ornynda qaza tapty», - delingen agenttik taratqan Shý oblystyq ishki ister basqarmasy aqparatynda.
