Foto: Videodan skrinshot
Qazaqstanda nemis ultynan shyqqan qariianyń jerleý rásiminen video áleýmettik jelide keń tarady. Ájeidi musylmandyq dástúr boiynsha jerlegen, dep habarlaidy Ult.kz.
Stalindik qýǵyn-súrgindi, deportatsiiany bastan keshken, túp-tamyry nemis, biraq qazaq otbasynan pan tapqan áieldiń taǵdyry Instagram qoldanýshylaryn tereń tolqytty.
Qariianyń nemeresiniń aitýynsha, ájesi Frida Qazaqstanǵa bala kezinde kelgen. Ákesi «Otanǵa opasyzdyq jasady» degen jalamen atylǵan. Al anasyn «halyq jaýy» retinde tutqyndaǵan. Frida ájei men onyń aǵasyn Qazaqstanǵa deportatsiialaǵan. Nemeresiniń sózinshe, olar Qazaqstanǵa kele jatqanda Frida aǵasymen birge vagonnan túsip, tamaq alýǵa shyqqan sátte poiyz jarylyp ketip, aǵaly-qaryndas kezdeisoq aman qalǵan. Ol kezde Frida nebári jeti jasta edi. Keiin ony qazaq otbasy asyrap alady.
18 jasynda Frida qazaq jigitine turmysqa shyǵyp, kúieýiniń qalaýymen islam dinin qabyldap, Farida esimin alǵan. Ol uzaq ta baqytty ómir súrip, toǵyz bala ósirgen, kóptegen nemere-shóbere súigen.
«Búgin men jai ǵana apashymmen qoshtaspaimyn… Búgin men balalyǵymmen qoshtasyp turmyn», — dep jazdy nemeresi Instagram-paraqshasynda video jariialap.
Ol ájesiniń meiirimi, qamqorlyǵy, eńbekqorlyǵy jáne jerdi súiýge úiretkeni, aýyldaǵy tamasha jyldary men baqytty jazǵy kanikýldar týraly estelikterimen bólisti.
«Artyńda ólsheýsiz mahabbat qaldyrdyń. Al meniń ishimde sen árdaiym ómir súresiń — jadymda, ádetterimde, júregimde», — dep jazdy ol.
Sondai-aq ol ájesine «balalyq shaǵy, bergen mahabbaty jáne úiretken barlyq dúniesi» úshin alǵys bildirdi.
Bul jariialanym Instagram qoldanýshylarynyń zor yqylasyn týdyryp, myńdaǵan qaralym men júrekke jetken pikirler jinady.
