Qazaqstandyq mýltserialdar endi Amerika qurlyǵynda kórsetiledi. Bul týraly «Balapan» arnasynyń direktory Maqpal Jumabai áleýmettik jelidegi paraqshasynda aitty, dep habarlaidy "Ult aqparat".
«Aldaǵy ýaqytta «Balapan» arnasynyń 5 animatsiialyq jobasy AQSh-ta kabeldik arnalar, al Latyn Amerikasy elderinde VOD jáne onlain-kanaldar arqyly kórsetiledi. Endi «Tynymsyz shójeler», «Sábi», «Erkeler», «Shahmat patshalyǵy», «Pyraqtar» jobalaryn atalǵan elderde aǵylshyn, ispan jáne portýgal tilderinde kórý múmkindigi bar. Kelisimshart AQSh-tyń jelilik jáne spýtniktik habar taratý qyzmetin júzege asyratyn «Olympusat» kompaniiasymen jasaldy», - dedi M. Jumabai.
Sonymen qatar, ol «Balapan»-nyń animatsiialyq jobalary Reseidegi №1 onlain-kinoteatr sanalatyn IVI.RU platformasyna júktelgenin jetkizdi.
«Endi «Kúlki izdegen Kúnekei», «Sábi», «Erkeler» mýltserialdaryn atalǵan platformadan tamashalaýǵa bolady. Aita ketý kerek, IVI.RU platformasynyń kontenti bir aida 50 millionǵa jýyq qaralym jinaidy», - dep tolyqtyrdy ol.
