Pediatriia jáne balalar hirýrgiiasy ǵylymi ortalyǵy Qyrǵyz Respýblikasynyń Ana men balany qorǵaý, Onkologiia jáne gematologiia ulttyq ortalyqtarymen yntymaqtastyq týraly memorandýmǵa qol qoidy, dep habarlaidy QazAqparat.
«Pediatriia jáne balalar hirýrgiiasy ǵylymi ortalyǵy» baspasóz qyzmetiniń málimetinshe, memorandým aiasynda eki el arasynda meditsinalyq kómek kórsetýdi arttyrý, meditsinalyq týrizmdi damytý, meditsina qyzmetkerler men dárigerlerdiń biliktilikterin arttyrý jáne basqa da salalar boiynsha ekijaqty áriptestik ornatylmaq. Shara barysynda sonymen qatar, Qazaqstan men Qyrǵyzstan meditsinalyq uiymdary arasynda 10 memorandýmǵa qol qoiyldy.
Aita keteiik, búgin Qyrǵyz Respýblikasynda Qazaqstannyń meditsina kúnderi bastaldy. Eki kúndik sharaǵa elimizdiń Densaýlyq saqtaý ministri Eljan Birtanov bastaǵan 100-den astam delegat qatysýda.
Is-shara QR Prezidenti Qasym-Jomart Toqaevtyń Qyrǵyz Respýblikasyna resmi sapary qarsańynda ótýde.
Qyrǵyzstandaǵy qazaqstandyq meditsina kúnderi – bul Qazaqstan men Qyrǵyzstan densaýlyq saqtaý júieleri arasyndaǵy yntymaqtastyqty kúsheitýge, meditsinalyq uiymdar arasyndaǵy ózara is-qimyldy keńeitýge, eki eldiń azamattaryna meditsinalyq kómek kórsetýdiń qoljetimdiligi men sapasyn qamtamasyz etý jolynda tájiribe men bilimmen, innovatsiialar men tehnologiialarmen almasýǵa baǵyttalǵan is-shara.
Sapar barysynda qazaqstandyq mamandar meditsinalyq uiymdarda azamattarǵa tegin keńes berýdi uiymdastyrýdy josparlaýda.
Sondai-aq, is-shara aiasynda Qazaqstannyń ozyq meditsinalyq uiymdarynyń qatysýymen meditsinalyq kórme ótedi.
