Aralas jekpe-jekten álem chempiony, qazaqstandyq Mariia Agapova MMA boiynsha eń iri promoýshn - Ultimate Fighting Championship (UFC) sportshylary qatarynda týrnirlerge qatysatyn boldy, dep habarlaidy "Ult aqparat".
Agapova UFC qataryna byltyrǵy tamyz aiynda-aq ótip keter edi, degenmen amerikalyq Treisi Kortesten utylyp, kelisimsharttan qur qalyp qoidy. Osy jeńilisten keiin Mariia Invicta FC promoýshny aiasynda eki márte aiqasqa shyqty.
Qyrkúiek pen qazandaǵy jekpe-jekte ol qarsylastary amerikalyq Aleksa Konners pen braziliialyq Mariliia Santosty birinshi raýndta ýaqytynan buryn jeńdi. Osy jetistikterdiń arqasynda UFC Agapovaǵa qaitadan nazar aýdardy.
Sporttaǵy jańa belesi týraly Mariia óziniń Instagram paraqshasynda jazdy.
«Armandar oryndalady. Meniń bir tatýymda osylai dep jazylǵan. Men ony biletinmin. Búgin men ómir boiy kóksep, ter tókken maqsat oryndaldy. Bapkerlerime, menedjerler men seriktesterime kóp rahmet. Men tipti úmitim úzilip, armanym endi oryndalmaidy dep túńilgen kezderde de jattyǵý úshin zalǵa baratynmyn. Al endi men UFC qataryndamyn, 2020 jyly osy jerde jekpe-jekke shyǵamyn. Munda búkil álemnen sportshylar jinalǵan – biz bir úlken otbasymyz. Osy otbasynyń múshesi atanǵanym úshin óte baqyttymyn. Jaqynda kitap jazamyn. Barlyq jankúierime rahmet. Qoldaý kórsetken dostaryma myń alǵys. Osy ýaqyt aralyǵynda bir nárseni túsindim – janyńda júrgenderdiń bári dos emes, seni urǵandardyń bári dushpan emes», - dep jazdy Mariia Agapova.
