Qazaqstandyq tarap Sardoba sý qoimasyn odan ári joiý boiynsha pozitsiiany ustanatyn bolady. Bul týraly Májilis depýtatynyń resmi saýalyna berilgen QR Premer-Ministr Asqar Maminniń jaýabynda aitylǵan, dep habarlaidy "Ult aqparat".
«Ózbekstan Respýblikasyndaǵy Sardoba sý qoimasy bógetiniń buzylýyna bailanysty osy jyldyń 8 mamyrynda Qazaqstan Respýblikasynyń Prezidenti Q.K.Toqaev pen Ózbekstan Respýblikasynyń Prezidenti Sh.Mirzieev telefon arqyly sóilesti. Áńgimelesý barysynda Memleketter basshylary transshekaralyq ózenderdiń resýrstaryn birlesip basqarý jáne paidalaný tetikterin jetildirý týraly ýaǵdalastyqqa qol jetkizdi. Máselen, Qazaqstan Respýblikasy jáne Ózbekstan Respýblikasynyń Prezidentteri qol jetkizgen ýaǵdalastyqtardy oryndaý maqsatynda Qazaqstan Respýblikasynyń Ekologiia, geologiia jáne tabiǵi resýrstar ministri M.Myrzaǵalievtiń jáne Ózbekstan Respýblikasynyń Sý sharýashylyǵy ministri Sh.Hamraevtiń deńgeiinde eki kezdesý, sondai-aq video-konferentsiia bailanys formatyndaǵy bir kezdesý ótkizildi», - dedi Úkimet basshysy.
Onyń atap ótýinshe, atalǵan kezdesýlerdiń barysynda qazaqstandyq jáne halyqaralyq sarapshylardy tarta otyryp, Sardoba sý qoimasyna tehnikalyq aýdit júrgizý jáne 1991 jyldan bastap salynǵan jáne qaita jańartylǵan sý obektilerine tekserý (monitoring) júrgizý týraly ýaǵdalastyqtarǵa qol jetkizildi.
«Bul rette, qazaqstandyq tarap Sardoba sý qoimasyn odan ári joiý boiynsha pozitsiiany ustanatyn bolady. Sonymen qatar, sheshim tehnikalyq aýdit nátijeleri boiynsha qabyldanady. Osyǵan bailanysty, taraptar Qazaqstan Respýblikasy men Ózbekstan Respýblikasy arasyndaǵy sý qatynastary salasyndaǵy yntymaqtastyq máseleleri jónindegi jol kartasyn ázirlep, oǵan problemalyq máselelerdi sheshýge baǵyttalǵan is-sharalardy qosa otyryp, qol qoidy», - dedi Premer-Ministr.
Úkimet basshysynyń atap ótýinshe, Jol kartasyna sáikes biyl Qazaqstan Respýblikasy men Ózbekstan Respýblikasynyń aýmaǵynda 1991 jyldan keiin salynǵan sý sharýashylyǵy qurylystaryna tekserý júrgizý kózdelgen.
«Osyǵan bailanysty Qazaqstan Respýblikasy Ekologiia, geologiia jáne tabiǵi resýrstar ministrligi tájiribeli sýshylar men jobalaýshy injenerler qatarynan qazaqstandyq sarapshylar bóliginiń quramyn qalyptastyrdy. Qyrkúiek aiynda qazaqstandyq sarapshylardyń 1991 jyldan keiin salynǵan sý sharýashylyǵy qurylystaryna tekserý júrgizý jáne Sardoba sý qoimasyna tehnikalyq aýdit júrgizý úshin Ózbekstan Respýblikasyna barýy kútilýde», - dedi Asqar Mamin.
