"Samuryq-Energo" kompaniiasy ózine qarasty "Moinaq GES" AQ-men birge Qytaidyń memlekettik damý bankinen alǵan qaryzdy merziminen buryn ótedi, dep habarlaidy Sputnik Qazaqstan.
"Samuryq-Energo" kompaniiasynyń departament basshysy Sergei Lidiń aitýynsha, valiýtalyq qaryzdyń somasy 136,6 million AQSh dollary kóleminde bolǵan. Ony merziminen buryn óteýdiń nátijesinde kompaniianyń valiýtalyq beresheginiń jalpy úlesi birden 17 protsentten 3 protsentke deiin tómendedi.
"Qytaidyń memlekttik damý bankinen alynǵan qaryzdyń mólsherlemesi 1,2 protsent boldy. Oǵan qosa, alty ailyq LIBOR (Londonnyń bankaralyq usynys stavkasy) bar. Ol shamamen 3,7 protsent. Al qaryzdyń merzimi 2029 jylǵa deiin eseptelgen edi", - dedi Li búgin baspasóz máslihatynda.
Departament basshysy Qytai bergen qaryzdyń qai aqshanyń esebinen ótelgenin de aityp berdi. Onyń sózine qaraǵanda, "Astana" halyqaralyq qarjy ortalyǵy arqyly "Moinaq GES" kompaniiasynyń qundy qaǵazdary satylymǵa shyǵarylǵan. Osylaisha, qaryzdy óteýge qajetti qosymsha qarjy tartyldy. Budan bólek, Qytaidyń memlekettik damý bankinde 5,6 milliard teńge kepilzat retinde jatty. Qaryzdy óteý kezinde osy qarjy da salynǵan.
"Halyqaralyq qarjy ortalyǵynyń birjasynda biz alǵashqy emitentterdiń biri boldyq. Aldaǵy ýaqytta osy yntymaqtastyq bailanystaryn jalǵastyrýǵa múddelimiz", - dep atap kórsetti Li.
Aita keteiik, Qantaev atyndaǵy Moinaq sý elektr stantsiiasy 2012 jyly paidalanýǵa berilgen bolatyn. Bul keshen Almaty oblysyndaǵy Sharyn ózeninde ornalasqan. Stantsiia Almaty, Jambyl, Qyzylorda men Túrkistan oblystaryn elektr energiiamen qamtamasyz etedi. Onyń qurylysyna Qazaqstannyń damý banki men Qytaidyń memlekettik damý banki qarjysy salynǵan edi.
