"سامۇرىق-ەنەرگو" كومپانيياسى ٶزٸنە قاراستى "مويناق گەس" اق-مەن بٸرگە قىتايدىڭ مەملەكەتتٸك دامۋ بانكٸنەن العان قارىزدى مەرزٸمٸنەن بۇرىن ٶتەدٸ, دەپ حابارلايدى Sputnik قازاقستان.
"سامۇرىق-ەنەرگو" كومپانيياسىنىڭ دەپارتامەنت باسشىسى سەرگەي ليدٸڭ ايتۋىنشا, ۆاليۋتالىق قارىزدىڭ سوماسى 136,6 ميلليون اقش دوللارى كٶلەمٸندە بولعان. ونى مەرزٸمٸنەن بۇرىن ٶتەۋدٸڭ نەتيجەسٸندە كومپانييانىڭ ۆاليۋتالىق بەرەشەگٸنٸڭ جالپى ٷلەسٸ بٸردەن 17 پروتسەنتتەن 3 پروتسەنتكە دەيٸن تٶمەندەدٸ.
"قىتايدىڭ مەملەكتتٸك دامۋ بانكٸنەن الىنعان قارىزدىڭ مٶلشەرلەمەسٸ 1,2 پروتسەنت بولدى. وعان قوسا, التى ايلىق LIBOR (لوندوننىڭ بانكارالىق ۇسىنىس ستاۆكاسى) بار. ول شامامەن 3,7 پروتسەنت. ال قارىزدىڭ مەرزٸمٸ 2029 جىلعا دەيٸن ەسەپتەلگەن ەدٸ", - دەدٸ لي بٷگٸن باسپاسٶز مەسليحاتىندا.
دەپارتامەنت باسشىسى قىتاي بەرگەن قارىزدىڭ قاي اقشانىڭ ەسەبٸنەن ٶتەلگەنٸن دە ايتىپ بەردٸ. ونىڭ سٶزٸنە قاراعاندا, "استانا" حالىقارالىق قارجى ورتالىعى ارقىلى "مويناق گەس" كومپانيياسىنىڭ قۇندى قاعازدارى ساتىلىمعا شىعارىلعان. وسىلايشا, قارىزدى ٶتەۋگە قاجەتتٸ قوسىمشا قارجى تارتىلدى. بۇدان بٶلەك, قىتايدىڭ مەملەكەتتٸك دامۋ بانكٸندە 5,6 ميلليارد تەڭگە كەپٸلزات رەتٸندە جاتتى. قارىزدى ٶتەۋ كەزٸندە وسى قارجى دا سالىنعان.
"حالىقارالىق قارجى ورتالىعىنىڭ بيرجاسىندا بٸز العاشقى ەميتەنتتەردٸڭ بٸرٸ بولدىق. الداعى ۋاقىتتا وسى ىنتىماقتاستىق بايلانىستارىن جالعاستىرۋعا مٷددەلٸمٸز", - دەپ اتاپ كٶرسەتتٸ لي.
ايتا كەتەيٸك, قانتاەۆ اتىنداعى مويناق سۋ ەلەكتر ستانتسيياسى 2012 جىلى پايدالانۋعا بەرٸلگەن بولاتىن. بۇل كەشەن الماتى وبلىسىنداعى شارىن ٶزەنٸندە ورنالاسقان. ستانتسييا الماتى, جامبىل, قىزىلوردا مەن تٷركٸستان وبلىستارىن ەلەكتر ەنەرگييامەن قامتاماسىز ەتەدٸ. ونىڭ قۇرىلىسىنا قازاقستاننىڭ دامۋ بانكٸ مەن قىتايدىڭ مەملەكەتتٸك دامۋ بانكٸ قارجىسى سالىنعان ەدٸ.
