Foto: Abil Doshanov/"TobolInfo"
Shekaralas oblystar men respýblikalyq mańyzy bar qalalardaǵy HQKO-larda sheteldikterdiń ótinimi kóbeidi. Osyǵan bailanysty kúsheitilgen rejimde jumys isteitin segiz halyqqa qyzmet kórsetý ortalyǵy bólingen, - dep habarlaidy Tengrinews.kz.
BAQ Qazaqstannyń shekaralas aimaqtarynda halyqqa qyzmet kórsetý ortalyqtaryna uzyn-sonar kezek paida bolǵanyn jazyp jatyr. Máselen, "Moi gorod" basylymy Isatai-Mahambet boiyndaǵy halyqqa qyzmet kórsetý ortalyǵyna kelgen reseilikter tańerteń erte jinala bastaǵanyn jazdy. Qazir kezek ortalyqtan alystap bara jatqany aityldy. Bári bank kartasyn ashýǵa JSN alýǵa nietti. Aqsha aiyrbastaý oryndarynda da kezek baiqalady.
Qostanaidaǵy Halyqqa qyzmet kórsetý ortalyqtarynyń birine reseilikter aǵylyp jatqany týraly taǵy bir basylym – "TobolInfo" habarlady. Olar da HQKO-ǵa JSN alýǵa kelgen. Olar basqa elge kóshpes buryn Qazaqstanda biraz ýaqyt qalýdy josparlaǵany aityldy.
"Azamattarǵa arnalǵan úkimet" memlekettik korporatsiiasynyń baspasóz qyzmeti ótken aptada sheteldikterdiń HQKO-ǵa ótinishteri sany artqanyn habarlady. Osyǵan bailanysty Astana, Almaty qalalarynda, sondai-aq Qostanai, Batys Qazaqstan, Soltústik Qazaqstan, Pavlodar, Aqmola jáne Aqtóbe oblystarynda kúsheitilgen HQKO-larda qyzmet kórsetý týraly sheshim qabyldanǵan.
JSN alýǵa ótinish bildirgen sheteldikter muny shekaralas oblystardaǵy jáne Almaty men Astanadaǵy segiz HQKO-da jasai alady:
- Almaty, Jetisý aýdany, Qulager shaǵynaýdany, Sýrikov kóshesi, 6a;
- Astana, Saýran kóshesi, 7;
- Pavlodar, Pavlov kóshesi, 48;
- Oral, Jambyl kóshesi, 81/2;
- Qostanai, Gashek kóshesi, 14;
- Petropavl, Áýezov kóshesi, 157;
- Kókshetaý, Áýezov kóshesi, 189a;
- Aqtóbe, Sáńkibai batyr dańǵyly, 249.
JSN alý úshin beirezidentte jeke basyn kýálandyratyn qujaty, kórsetiletin qyzmetti alýshynyń ókili júgingen jaǵdaida notarialdy kýálandyrylǵan senimhaty, sondai-aq ótinishi bolýy qajet. Sheteldikter úshin JSN kýáligin berý merzimi bir jumys kúni. Qazaqstanda JSN alý tegin.
HQKO jumys kúnderi saǵat 9:00-den 18:00-ge deiin jumys isteidi. Kelýshiler halyqqa qyzmet kórsetý ortalyǵynda mobildi halyqqa qyzmet kórsetý ortalyǵy, eGov mobile, EgovKzBot2.0 Telegram boty, eGov elektron úkimet portaly arqyly jáne 1414 biryńǵai bailanys ortalyǵynyń nómirine qońyraý shalý arqyly aldyn ala tapsyrys bere alady.
