«Jýsan» operatsiiasy arqyly Siriiadan elge oralǵan kelinshek ol jaqtaǵy aýyr kúnderi týraly aityp berdi. Almaty oblysynyń turǵyny Sham eline úlken ulyn izdep barǵan eken. Kópbalaly ana birneshe suraqqa jaýap berýge kelisti.
– Sham eline ne úshin bardyńyz?
– Men Siriiaǵa úlken ulymdy izdep bardym. Men ony elge qaitarý úshin otbasymen bardym. Barlyǵymyz bes adam boldyq. Aqyr sońynda bir ulymnan aiyryldym. Al ekinshisi bolsa tutqynǵa tústi. Qazir ol Irakta.
– Ol jaqta neniń kýási boldyńyz?
– Ol jaqta DAISh-ti qoldamaǵandy kelip úiden zorlyqpen alyp ketip, óltiretin. Balalarǵa arnalǵan «Mýaskarlar» lagerler boldy, ol jerde gomoseksýalizm boldy. Balalarǵa ólim jazasyn kórsetý arqyly zulymdyqqa úiretti. Nátijesinde olar janýarlarǵa qatygezdik kórsetip, janýarlardy baýyzdap, olardy «kápirler» men «shaitandar» dep atady. Olardyń psihikasy osy baǵytta qalyptasty. Olarǵa árdaiym qandy shaiqasty kórsetip otyrdy. Tipti balalardyń bir birine oq atqan kezderi de boldy.
–DAISh-tyń sodyrlarynan qashqysy kelgender kóp boldy ma?
– Iá, kóbisi qashýǵa daiyn boldy. Biraq olar qoryqqannan úndemei aitqandaryna kónip júrdi. Eshkim óz oiyn ashyq aita almaityn. Sebebi, olardy sol úshin jazalaýy múmkin edi. Ketkisi kelgenderdi DAISh sodyrlary «mýrad» dep sanaityn.
– Sizdiń ulyńyz DAISh qataryna qalai qosyldy?
– Meniń balamdy 14 jasynda alyp ketti. Ol arnaiy áskeri daiyndyqtan ótken joq. Iaǵni, tájirbiesiz boldy. Ol oqýǵa niet bildirgen. Biraq oǵan ámir buiryq berip, «kimniń oqitynyn, kimniń oqymaitynyn munda men sheshem» dep, ony jaýyngerlerdiń aldyńǵy qataryna jiberdi. Shaiqas bastalǵanda meniń balam jaraqat alyp, iraktyqtardyń qolyna tutqynǵa tústi. Sodyrlar ony soǵys alańyna tastap ketken.
–DAISh balańyzdy qutqarýǵa áreket jasady ma?
– Olar menen 5000 AQSh dollaryn alyp, aqshany Iraktaǵy qorǵaýshyǵa jiberemiz degen. Aqyry aqshany qaitarǵan joq. Balam týraly eshqandai habar bermedi.
– Siriiaǵa barýdy kózdegenbaýyrlarymyz ben qandastarymyzǵa ne aitar edińiz?
– Meniń aitatynym - ol jerdegi jaǵdai islam emes, shariǵat emes jáne ol jaqta eshqandai halifat joq.
– Áńgimeńizge rahmet!
