Otandyq kásiporyndar memlekettik tapsyrys boiynsha ókpeni jasandy jeldetý apparattaryn shyǵarýdy aiaqtady, dep habarlaidy "Ult aqparat".
QR Indýstriia jáne infraqurylymdyq damý ministrliginen málim etkendei, QR Densaýlyq saqtaý ministrligi barlyǵy 1500 apparatqa tapsyrys bergen. Sonyń eń sońǵy partiiasy – 102 apparat Qostanai jáne Aqmola oblysynyń aýrýhanalaryna jetkizildi.
«Ózge óńirlerdiń ótinimderi tolyqtai oryndaldy. ÓJJ apparattary qoiylyp, mamandar oqytylyp, qondyrǵylar servistik qyzmet kórsetýge berildi.
Ókpeni jasandy jeldetetin «BIYOVENT» statsionarlyq apparattary otandyq «Qazaqstan ASELSAN injiniring» JShS qorǵanys-ónerkásiptik kesheninde jasaldy.
Budan bólek, biylǵy tamyz aiynda QR IIDM QR Densaýlyq saqtaý ministrligimen birlesip, «Tynys» AQ-da shyǵarylǵan shaǵyn ÓJJ apparattarymen jedel járdem stansalaryn qamtamasyz etý boiynsha memlekettik tapsyrysty aiaqtady», - dedi QR IIDM-nen.
Málim etilgendei, osylaisha, ÓJJ apparatynyń otandyq óndirisin jolǵa qoiý jónindegi Memleket basshysy men QR Úkimetiniń tapsyrmasy oryndalyp, pandemiianyń yqtimal ekinshi tolqynyna daiyndyq aiasynda meditsinalyq mekemeleri ÓJJ apparattarymen jetkilikti mólsherde qamtamasyz etildi.
«Óz kúshimizben ÓJJ apparatyn óndirý máselesi kóktemde, COVID-19 aýrýynyń alǵashqy tolqyny kezinde týyndady. Ol kezde ÓJJ apparattaryn jetkilikti kólemde aqshaǵa satyp alý múmkin bolmai qaldy. Ár el ózderiniń qajettilikterin ótep, baǵa aspandap ketti. Bir apparat úshin 20 mln teńgege deiin surady», - deidi QR IIDM Qorǵanys ónerkásibin damytý jónindegi departament direktory Sergei Chernenok.
