Halyqaralyq qarttar kúnine orai «Azamattarǵa arnalǵan úkimet» memlekettik korporatsiiasy zeinetaqy alatyn zeinetkerler jónindegi málimetti bólisti. Búginde Qazaqstanda 2,2 mln zeinetker bar, dep habarlaidy QazAqparat.
Zeinetaqy alý qyzmetin rásimdeýmen memlekettik korporatsiia filialdarynyń áleýmettik qamsyzdandyrý bólimderi ainalysady.
Ondaǵy málimetterge sáikes, zeinetkerlerdiń basym kópshiligi Almaty oblysynda turady – 234 043 adam.
Ekinshi orynda Shyǵys Qazaqstan oblysy – 233 109 adam, reiting úshtigin Almaty qalasy túiindeidi – 229 994 adam.
Zeinetkerlerdiń eń azy - Mańǵystaý (55 388), Atyraý (61 252) jáne Qyzylorda (76 423) oblystarynda turady.
«1 qazanda Halyqaralyq qarttar kúni atap ótiledi. Bul mereke úlkenderdi qurmettep, atalar men ájelerimizge kóńil bólýge shaqyrady. Memlekettik korporatsiia zeinet jasyndaǵy qyzmet alýshylarǵa qashanda kóp kóńil bólýge tyrysady. Bizde zeinetkerlerdiń úiine baryp qyzmet kórsetetin mobildi HQO bar. Ár bólimde zeinetkerler kezek kútpesten Memlekettik qyzmetterdi ala alatyn jeńildik terezesi bar. Eki jyldan beri korporatsiia proaktivti tásilmen zeinetke shyǵý múmkindigin synap keledi. Bul bolashaq zeinetker zeinet jasyna jetkende, barlyǵyn proaktivti túrde rásimdeýdi usynatyn SMS-ke jaýap berý arqyly rásimdeletin qyzmet. Biz barshańyzǵa densaýlyq pen uzaq ǵumyr tileimiz», – dedi «Azamattarǵa arnalǵan úkimet» memlekettik korporatsiiasynyń basqarma tóraǵasy Ádil Qojyqov.
Qazir zeinetke shyǵý úshin HQO-ǵa júginý qajet.
Ol úshin bolashaq zeinetker kelesi qujattardy ótkizedi: jasyna bailanysty zeinetaqy tólemderin taǵaiyndaý týraly ótinish, jeke kýálik jáne onyń kóshirmesi, tabysy jáne zeinetaqy tólemderi týraly anyqtama (jumys berýshi nemese memlekettik kiris organy beredi), eńbek kitapshasy nemese eńbek ótilin rastaityn basqa da qujattar.
Jaǵdaiǵa qarai ózge de qujattar suratylýy múmkin – bilimi týraly diplom, áskeri bilet, neke týraly kýálik, balalardyń týý týraly kýálikteri jáne basqalar.
Eger zeinetke shyǵýshynyń múgedektigi bolsa nemese jaýyngerlik is-qimyldarǵa qatyssa, eń joǵary radiatsiialyq qater aimaqtarynda tursa, «qandas» mártebesi bolsa, rastaityn qujattar qosymsha usynylýy tiis.
Zeinetaqy tólemderin rásimdeý úshin HQO-ǵa zeinet jasyna tolǵanǵa deiin 10 kún buryn júginý qajet.
2021 jyly Qazaqstanda erler úshin zeinetkerlik jasy – 63 jas, áielder úshin – 60 jas.
