Ál-Farabi atyndaǵy QazUÝ-dyń Ǵylymi-tehnologiialyq parkiniń jas mamandary Janý máseleleri ǵylymi-zertteý institýty mamandarymen birge betke arnalǵan ALFASHIELD qorǵanys ekranyn ázirlep shyǵardy, dep habarlaidy "Ult aqparat" atalmysh joǵary oqý ornynyń baspasóz qyzmetine silteme jasap.
Pandemiia bastalǵan kezde kóptegen tehnologiialyq kompaniialar meditsina qyzmetkerlerine arnalǵan qorǵanys ekrandarynyń ártúrli nusqalaryn shyǵardy. Keibir kompaniialar tipti óz nusqalaryn jasaǵysy keletinderge ázirlemelerin ashyq usyndy. Kóptegen úlgiler 3D-printermen jasalady. Ádette osyndai bir qorǵanys ekranyn basyp shyǵarý ortasha eseppen 1,5-2 saǵat ýaqyt alady. Sondyqtan QazUÝ-lyq jastar virýsqa qarsy qorǵanys ekrandarynyń ózindik nusqasyn ázirledi. Onyń basty ereksheligi – daiyndaý jyldamdyǵynyń tiimdiliginde. Mundai qorǵanys ekrandaryn óndirý úshin 3D-printerdiń qajettigi talap etilmeidi. Sondai-aq tehnologiia daiyndaý barysyn 5-6 ese jedeldetýge múmkindik beredi. Joba ázirleýshileriniń aitýynsha, kúnine 2 adam 100-ge jýyq qorǵanys ekranyn daiyndai alady. Elimiz jáne álem boiynsha aýrýdy juqtyrýshylar sany kún sanap údep jatqan qazirgi jaǵdaida bul óte mańyzdy.
«Bet qorǵanys ekranynyń antistatikalyq materialynyń shynaiylyǵy paidalanýshyǵa kóz aldyndaǵy obektilerge kedergisiz sholý jasaýǵa múmkindik beredi. Ekran virýspen birge túrli suiyqtyqtar men shań-tozańdardyń bet pen kózge túsýinen qorǵaidy. Nátijesinde COVID-19 koronavirýsyn juqtyrý qaýpin birneshe ese tómendetedi», - deidi QazUÝ tehnoparkiniń direktory Ámirhan Temirbaev.
Ónimniń alǵashqy tutynýshylarynyń biri ýchaskelik dáriger Rozgúl Úrkembaeva: «QazUÝ tehnoparki daiyndaǵan qorǵanys ekranyn jarty jyldan astam paidalanyp kelemin. Óte yńǵaily, jaǵymdy material ári bet ólshemińe qarai beiimdeledi. Kúni boiy taǵýǵa qolaily. Ainalany anyq kóremin, tipti keide betimde qorǵanys ekranynyń bar ekenin de umytyp ketemin. Zalalsyzdandyrǵanda sapasy esh ózgermeidi. Pandemiia kezinde elge asa qajet ónim ári bizge kómek retinde syiǵa tartyldy»,- dep óndirýshilerge alǵysyn bildirdi.
Tehnopark mamandary ýniversitet qoldaýymen áleýmettik joba aiasynda ónimniń alǵashqy legin shyǵaryp, qala boiynsha meditsina qyzmetkerlerine taratyp berdi. Qorǵanys quralynyń quny, naryqtaǵy basqa nusqalarmen salystyrǵanda, eki ese tómen, al sapasy joǵary. ALFASHIELD ekrandaryn ár qoldanar aldynda antiseptikpen súrtip, qaita paidalana berýge bolady.
QazUÝ ǵalymdary daiyndaǵan kezekti otandyq ónimdi meditsina qyzmetkerlerimen qatar, kópshilikpen tyǵyz jumys jasaityn bank, bilim berý ortalyqtary, HQKO, saýda dúkenderi, sulýlyq salondarynyń qyzmetkerleri men bortserikterge taǵý usynylady.
