Qazaqstandyq ǵalymdar qoljetimdi dezinfektsiialyq qural jasap shyǵardy. Bul týraly UǴA prezidenti Murat Jurynovtyń «Egemen Qazaqstan» gazetinde jariialanǵan maqalasynda aitylǵan, dep habarlaidy "Ult aqparat".
«...Dúniejúzilik densaýlyq saqtaý uiymy (DDU) AQSh jáne Japoniia ǵalymdary ázirlegen virýsqa qarsy dezinfektsiialaý quraldaryn, antivirýstyq sanitaizerler usyndy. Olar barlyq virýstarmen qatar, dál COVID-19 virýsyn joiý arqyly óte tiimdi jumys atqarady. Alaida olardyń quramyna kiretin keibir komponentter – himiialyq zattar Qazaqstanda joq nemese jetkizilýi qiyn. Sondyqtan olardyń biologiialyq antivirýstyq belsendiligin saqtai otyryp, qoljetimdi basqa himikattarǵa aýystyrý kerek boldy. Bul tapsyrmany D. Sokolskii atyndaǵy Janarmai, kataliz jáne elektrohimiia institýtynyń ǵalymdary qolǵa aldy. Olar ondaǵan túrli himreaktivterdi synap, antivirýstyq sanitaizerlerdiń ártúrli dezinfektsiialyq quramdaryn jasady. Bilim jáne ǵylym ministri A.Aimaǵambetovtyń qoldaýymen Ulttyq biotehnologiialyq ortalyqta (Nur-sultan q.), sonymen qatar Virýsologiia jáne mikrobiologiia institýtynda (Almaty q.) synaqtan ótkizdi. Biz karantin kúnderi bir top ǵalymdarǵa jumys isteýge ruqsat etken Almaty jáne Nur-Sultan qalalarynyń ákimdikterine alǵys aitamyz. Sonyń nátijesinde, himiialyq-biologiialyq zertteýler kórsetkendei, DDU sanitaizerlerinen eshqandai kemshiligi joq, asa tiimdi, sondai-aq qoljetimdi dezinfektsiialyq quraldar jasalyp shyqty...» dep jazady ǵalym maqalasynda.
Murat Jurynovtyń aitýynsha, sanitaizerlerge qoiylatyn basty talap – virýstardy jedel túrde jáne tolyq joiý.
«...Adamnyń immýniteti men fizikalyq kúiin kóteretin belgili tásilderdiń mańyzy zor. Sondai-aq qorqynysh pen pessimizmnen de arylý kerek. Qazaqstan joǵary bilimdi, ǵylymy men mádenieti damyǵan memleket ekenin umytpaýymyz kerek. Al jalpy alǵanda, biz intellektýaldyq deńgeidiń damýy boiynsha Aziia qurlyǵyndaǵy Japon, Qytai, Ońtústik Koreia elderinen ǵana qalyspyz. Basqa memleketter bizben teń nemese artta. Bul – úlken jetistik!» - dep túiindeidi ǵalym maqalasyn.
