Fýtboldan Qazaqstan ulttyq quramasynyń jartylai qorǵaýshysy Georgii Jýkov áleýmettik jelidegi jazbasy úshin quramadan shyǵarylýy múmkin, dep habarlaidy Sputnik Qazaqstan.
Fýtbolshy Instagram jelisinde polshalyq gazetakrakowska basylymyna bergen suqbaty jaily aityp, oqyrmandarynyń suraǵyna jaýap beripti. Alaida ol Qazaqstanda óner kórsetkenimen ózin sheteldik oiynshy siiaqty sezinipti.
"Qazaqstanda bolǵan kezde menimen qarym-qatynas sheteldik (oiynshyǵa – Sputnik) jasalǵandai boldy. Qoldaý men qurmet tiisti deńgeide kórsetilgen joq. Iaǵni, jergilikti fýtbolshylarǵa kórsetilgendei. Men qaita Eýropaǵa oraldym. Demek, men birden patriot bolyp, memleketti nasihattaýym qajet pe? Men "Qairatqa" alǵysymdy bildiremin. Maǵan qoldaý kórsetken adamdarǵa alǵysymdy aitamyn.
Qazaqstanda meni sheteldik dep sanady. Mundai jaǵdaiǵa shydaý óte qiyn. Jattyqtyrýshylar (men qazir Shpilevskii týraly aityp turǵan joqpyn) saǵan qazaq retinde, al qazaqtar saǵan legioner retinde qaraidy. Bul óte qiyn jaǵdai. Maǵan ońai bolǵan joq. Qazaqstandaǵy qoǵam, jýrnalister, mamandar, kommentatorlar tarapynan moiyndaý bolǵan joq. Men Qazaqstanda bolmaǵan siiaqtymyn", - dep jazdy ol.
Qazirgi tańda fýtbolshynyń Instagram-daǵy @Georgyzhukov8 jeke paraqshasy óshirýli. Qazaqstandyq buqaralyq aqparat quraldary taratqan málimetke sáikes, sportshynyń 21,2 myń oqyrmany bolǵan.
Oiynshynyń jelidegi pikirine qatysty Qazaqstan fýtbol federatsiiasynyń bas hatshysy Azamat Aitqojin óz oiyn bildirdi. Ol oqiǵanyń mán-jaiyn anyqtaýǵa nietti.
"Buqaralyq aqparat quraldary men áleýmettik jelilerde Qazaqstan ulttyq quramasynyń jartylai qorǵaýshysy Georgii Jýkovtyń aitqan sózi tarady. Fýtbolshymen kezdesip, sóilesemiz. Tiisti shara qoldanamyz. Ulttyq quramada oinaityn fýtbolshylar el namysyn abyroimen qorǵaýy mindet", - dep jazdy bas hatshy Qazaqstan fýtbol federatsiiasynyń resmi saitynda.
Aita keteiik, almatylyq "Qairattyń" 25 jastaǵy burynǵy oiynshysy Georgii Jýkov búginde polshanyń "Visla" fýtbol klýby sapynda óner kórsetedi.
