Avetik Ámirhanian, Lázzat Súleimen, Albert Raý, Gúlnara Bijanova. Kollaj: Tengrinews.kz
Qazaqstan Parlamenti VII shaqyrylymynyń ekinshi sessiiasynyń jumysy aiaqtaldy. Depýtattar aldaǵy demalysqa ne josparlap otyrǵanyn bólisti, - dep habarlaidy Tengrinews.kz agenttigi.
Aita keteiik, depýtattar qyrkúiekke deiin demalysqa shyqty.
"Qazir saparlar, halyqpen kezdesýler josparlanǵan. Kezdesýler óte belsendi ótedi. Qazir halyq sheshilýge tiis máselelerdi kóp qoiyp otyr. Qańtar oqiǵalarynan keiin sheshimin kútetin máseleler kóp. Demalys ýaqytynda bul kezdesýler jalǵasady. Qazaqstanda otbasymmen shaǵyn demalys bolady, biraq jumys jalǵasady. Kúzde depýtattyq saýaldarǵa daiyndyq júredi. Qazir halyqty tolǵandyryp otyrǵan túitkildi máseleler Úkimet aldynda sheshilip, qurylymdalyp, usynylýy tiis", - dedi senator Lázzat Súleimen Májilis kýlýarynda.
Depýtattardyń kóbi Qazaqstanda demalýdy josparlap otyr.
"Qazir Baianaýylda birneshe kún demalǵym keledi. Negizi Almaty oblysynda bolamyn, keibir oblystarda halyqpen kezdesý ótkizemin. Shaǵyn demalys bolady", - dedi senator Súleimen.
Májilis depýtaty Avetik Amirhanian demalysyn otbasymen ótkizýge nietti.
"Aldymen halyqpen jumys isteimiz. Óńirler boiynsha 10 kún jumys istep, sodan keiin ǵana demalysqa shyǵamyz, kelesi sessiiaǵa daiyndalamyz. Úide otbasymmen, balalarmen, nemerelerimmen demalýdy josparlap otyrmyn. Batys Qazaqstan oblysynda, Oralda bolamyn", - dedi Amirhanian.
Májilismen Gúlnara Bijanova demalysqa shyqpaq emes. Onyń aitýynsha, jazǵa arnalǵan jumys kestesi daiyn. Onda kóptegen kezdesý men shuǵyl jumystar bar.
"Óńirde jazda jasalatyn jumys kóp. Birinshiden, qazir biz óńirlerge kezdesýlerge attanamyz, keste josparlanǵan, adamdar kútip otyr, reforma ótti, másele kóp. Parlamentte biz alǵan máseleler baqylaýda, kúzde zańdarǵa kiremiz. Bul máselelerdi sheshý kerek. Negizi, joq (demalmaimyn. - Avtor.)", - dedi Gúlnar Bijanova.
Albert Raý da demalysyn bosqa ótkizgisi kelmeidi. Májilismenniń aitýynsha, alda kóp jumys kútip tur.
Buǵan deiin Májilis spikeri Erlan Qoshanov jetinshi sailanǵan Qazaqstannyń Parlamenti ekinshi sessiiasynyń jabylǵanyn jáne depýtattar demalysqa shyqqanyn málimdegen edi.
