Qazaqstandyq býkmekerler baspasóz máslihatyn ótkizip, «Oiyn biznesi týraly» zańǵa engizilgeli otyrǵan ózgeristerge qarsy shyqty, dep habarlaidy QazAqparat.
Baspasóz máslihatynda býkmekerler Májiliste «Oiyn biznesi týraly» zańǵa ózgerister engizgeli jatqan jumys tobynyń bastamasyna alańdaýshylyq bildirip otyr. Zańǵa engiziletin ózgerister býkmekerlik keńselerdiń kassalarynyń bárin de arnaiy belgilengen «rezervatsiiaǵa» nemese «qumar oiyndar aýmaǵyna» kóshirýdi kózdeidi. Naqtyraq aitqanda, ol aýmaqtar - Aqmola oblysynyń Býrabai aýdany men Qapshaǵai sý qoimasyndaǵy núkte. Sondai-aq býkmekerlik qyzmetpen bailanysty barlyq esepshilik stavkalardy esepteý ortalyǵyn qurý josparlanǵan.
«Negizinde, zań jobasyn ázirleý máselesin biz kótergen joqpyz. Tek óz usynystarymyzdy bildirgen edik. Tipti «Oiyn biznesi týraly» zańnyń ózi qumar oiyndar men stavkalardy retteidi. Al býkmekerlik oiyn - qumar oiyn emes, jai stavka. Álemniń kóptegen elinde sporttyq «beking» týraly zań bar. Bizdiń biznes-stavkalarymyz sporttyq is-sharalar kezinde ǵana jasalady. Iaǵni, biz kazino da, qumar oiyn avtomattary bólmesi emespiz. Biz - biznestiń múlde basqa túrindemiz. Árine, jeke zańǵa sai júrgizýdi qalaimyz», - dedi Qazaqstan býkmekerler qaýymdastyǵynyń tóraǵasy Aitýar Madin baspasóz máslihatynda.
Brifingte sóz sóilegen býkmekerlik keńestiń ókilderi zań jobasyn qabyldaý jaǵymsyz saldarǵa ákelýi múmkin ekenin atap ótti. Olar býkmekerlerdiń 5 myńǵa jýyq qyzmetkeri jumyssyz qalatyny, al Esep ortalyǵy býkmekerlerdiń klienttik bazasynda derbes derekterdi jinai alatyny jaily argýmentti alǵa tartady.
Olardyń aitýynsha, býkmekerler biýdjetke jylyna 20 mlrd teńge tólep otyr.
